Biregeı baǵdarlamany júzege asyrý bastaldy

Keshe Ortalyq kommýnıkasııalar qyzmetinde bıznesti qoldaý men damytýǵa arnalǵan biregeı baǵdarlamany júzege asyrý bastalǵany jarııa boldy. Ol týraly «Báıterek» ulttyq basqarýshy holdıngi» AQ basqarýshy dırektory Qanysh Tóleýshın, «Damý» kásipkerlikti damytý qory» AQ basqarma tóraıymy Lázzat Ibragımova, atalǵan qordyń basqarýshy dırektorlary Ǵabıt Lesbekov pen Nurlan Aqshanov aıtty. Kásipkerlikti qoldaý men damytýǵa qatysty buǵan deıingi birqatar baǵdarlamalar men qujattardyń basyn biriktirgen biregeı baǵdarlamanyń mańyzyna toqtalǵan Q.Tóleýshın, ondaǵy maqsat bıznestiń damýy men órken jaıýyn qamtamasyz ete otyryp, aımaqtarda jańa jumys ornyn ashý úshin jumys istep turǵan kásiporyndarǵa qoldaý kórsetý ekenin táptishtedi. Al baǵdarlamanyń jetildirilgen sharalary jóninde «Damý» qorynyń jetekshisi áńgimeledi. Tóraıymnyń aıtqanyna ılansaq, 180 mln. teńgege deıingi somadaǵy jobalardy qarjylandyrý jumystary jedeldetilipti. «Sózdi Úkimet qabyldaǵan jańa biregeı baǵdarlamadan bastaıyq. Bıznesti damytý men qoldaýǵa arnalǵan atalǵan baǵdarlama «Bıznestiń jol kartasy-2020» jáne basqa da birqatar salalyq baǵdarlamalardyń bazasynda jasaldy. Jańa baǵdarlama jasaýdy ótken jyly Prezıdent Úkimetke tapsyrǵan bolatyn. О́tken aıda Úkimet jańa baǵdarlama týraly qaýly qabyldady. «Damý» qory osy jańa baǵdarlamanyń qarjy agenti bolyp qala beredi», dedi L.Ibragımova. Qordyń baspasóz paraqshasyndaǵy aqparatqa zer salsaq, birinshi kezekte bul baǵdarlamanyń aýyl kásipkerleri úshin qoljetimdiligi eselep artady. «Birinshi baǵyt boıynsha eldi mekenderde, shaǵyn jáne monoqalalarda bıznes damytylady. Birinshi sáýirden bastap ekinshi deńgeıli bankter qarjylandyratyn barlyq jobalar salalyq shekteýsiz sýbsıdııalanatyn boldy. Sondaı-aq, baǵdarlama jyldam bola tústi. Kóptegen kásipkerlerdiń jobasy ekinshi deńgeıli bankten qoldaý tapqannan keıin, óńirlik úılestirý keńesinde qaralatyn edi. Endi «Damý» qory kepildendiretin quny 180 mln. teńgege deıingi jobalar óńirlik úılestirý keńesiniń qaraýynan ótpeıtin bolady. Oǵan qosa, jańa baǵdarlama boıynsha qoldaý kólemi artyp, bıznesti salalyq qoldaý baǵyty engizilip otyr. Onyń aıasynda «Bıznestiń jol kartasy-2020» baǵdarlamasynyń basymdyq berilgen salalary saqtaldy. Munymen qatar, ındýstrııalyq-ınnovasııalyq damý baǵdarlamasy aıasynda quny 4,5 mlrd. teńgege deıingi barlyq jobalar boıynsha sýbsıdııalaý mólsherlemesi 10 paıyzǵa deıin ulǵaıtyldy. Osylaısha, baǵdarlama jobalary ekinshi deńgeıli bankterde basymdyqqa ıe bolady», dedi tóraıym. Úshinshi baǵyt boıynsha valıýtalyq táýekelderdi tómendetý kózdelip otyr. Kásipkerlik áleýetti arttyratyn tórtinshi baǵyt boıynsha qoldaýdyń artýyna baılanysty qarjylaı emes baǵdarlamalar boıynsha birqatar fýnksııalar «Atameken» ulttyq kásipkerler palatasyna berildi. Bıylǵy 1 qańtardan bastap «Bıznes-keńesshi» baǵdarlamasyn, aýdandar men monoqalalardaǵy kásipkerlikti qoldaý ortalyqtaryn óńirlik kásipkerler palatasy qolǵa alǵan. Nurbaı ELMURATOV, «Egemen Qazaqstan».