О́ńirlerden 36 adam iriktelip, aqtyq synǵa joldama aldy. «Beıneleý óneri», «Perfomans», «Vıdeo túsirý» «Sándik-qoldanbaly óner», «Mýzyka jáne poezııa», «Art-perfomans» atalymdary boıynsha alty jeńimpaz 1 mıllıon teńgelik sertıfıkat ıegeri atandy. Atap aıtsaq, Aıbolat Nuryllaev, Nurjigit Naýhanbaev, Anelıa Satybaldıeva, Regına Zemlıhanova, Aıana Raqymjanova, Arman Latypaev júzden júırik shyqty.
«Is-sharanyń negizgi maqsaty – ekologııalyq qundylyqtar qalyptastyrý, balalardy ekologııalyq turǵydan tárbıeleý. «Aiala» ekofestıvali Memleket basshysynyń tapsyrmasy boıynsha ótkizildi. Búgin – balalardy qorǵaý kúni. Bul tamasha is-shara ekologııa salasynda jumys isteıtin barlyq iri úkimettik emes uıymdardy jáne olar konkýrsqa qatysqan shyǵarmashyl balalardyń basyn qosty. Atalǵan bastama aldaǵy jyldarda da jalǵasyn tabady dep úmittenemiz. Bul – balalarǵa ekologııalyq tárbıe berýge múmkindik beretin qadam», dedi Mádenıet jáne aqparat vıse-mınıstri Evgenıı Kochetov.
Aıta keteıik, elimizde bul joba alǵash ret kreatıvti ındýstrııa, balalar men ekologııany toǵystyrǵan ortaq alańǵa aınalyp otyr.
«Bir aı boıy biz elimizdiń túkpir-túkpirinen shyǵarmashyl daryndy balalar arasynda konkýrs ótkizdik. Ekologııa taqyryby boıynsha 250-den astam ótinim qaraldy. Biz jastarǵa shyǵarmashylyq arqyly qorshaǵan ortaǵa qamqorlyq jasap, óz sezimderin bildirýge múmkindik berý óte mańyzdy dep sanaımyz», dedi Lıma Dıas.
Festıvalǵa kelýshiler sýretshilerdiń qolynan shyqqan «5 element» ınstallıasııasymen tanysty. Onda aýa, sý, ot, jer elementteri bir sheńberge biriktirilgen. Ortadaǵy aınadan jasalǵan júrek adamnyń ózine ári aınalasyndaǵylarǵa degen súıispenshilikti bildiredi. Týyndy tabıǵat pen adamnyń tutastyǵy men úılesimdiliginiń rámizindeı. Osylaısha, avtorlar kópshilikti tabıǵatty aıalaýǵa shaqyryp, elimizdiń ekologııalyq problemalaryna nazar aýdarǵysy keldi.
Sondaı-aq festıval aıasynda kıiz basý, keskindeme, qarjylyq saýattylyq jáne makýlatýradan panno jasaý boıynsha sheberlik synyptary ótti.
Aıta keteıik, «Aiala» art-ekofestıvalin Mádenıet jáne aqparat mınıstrligi men «Azamattyq bastamalardy qoldaý ortalyǵy» KeAQ uıymdastyryp otyr. Is-sharaǵa «Halyq» qaıyrymdylyq qory demeýshilik kórsetken.
