Saýalnama nátıjesi boıynsha balalardyń kitaphanalarǵa degen qyzyǵýshylyǵy artyp keledi. Olar ásirese fantastıka, komıkster men kórkem ádebıet oqyǵandy unatady.
Eń kóp oqylatyn Berdibek Soqpaqbaevtyń «Balalyq shaqqa saıahat», «Meniń atym Qoja», Saıyn Muratbekovtiń «Jabaıly alma», Joan Roýlıńniń «Hárrı Potter», Mark Tvenniń «Tom Soıer» shyǵarmalary boldy.
Odan bólek Baıanǵalı Álimjanov, Tolymbek Ábdiraıym, Zıra Naýryzbaeva, Serikbol Hasan, Zaýre Tórehan, basqa da avtorlardyń týyndylaryn jetkinshekter qyzyǵýshylyqpen oqyǵan.
Balalar súıip oqıtyn basylymnyń biri – komıkster. Jas oqyrmandar Ularbek Nurǵalymulynyń «Ilııas pen Zańǵardyń plansheti», Orazhan Jaqyptyń «Erketaı», Ilııas Iýsýftyń «Kereı men Jánibek» shyǵarmalaryn, sondaı-aq Maık Barfıldtiń «Komıkstegi álem tarıhy», «Komıkstegi jaratylystaný» aýdarmasyn unatady.
Ertegilerge kelsek, «Qazaq jáne álem halqynyń ertegileri», «Avtorlyq ertegiler», «Alataý ertegileri» «Tańdaýly ertegiler», Charlz Perro men Aǵaıyndy Grımmderdiń ertegileri kóp suralady eken.
Al bala oqyrmany kóp óńirlerdiń kósh basynda Túrkistan oblysy tur. Atalǵan óńirde 248 299 oqyrman (14,3 paıyz) bar. Jambyl oblysynda 110 598 (6,4 paıyz), Qaraǵandy oblysynda 105 259 (6,1 paıyz) oqyrman kitap oqıdy.
Aıta keteıik, elimizdegi balalar kitaphanalarynyń qyzmeti balany tárbıeleýge, bilim berýge, aqparattandyrýǵa, tulǵalyq damytýǵa baǵyttalǵan.
