Foto: ms.pngtree.com
Sonyń ishinde, Erlan Saırovtyń 6 naýryz kúni ótken Májilistiń jalpy otyrysynda Tamara Dúısenovaǵa qarata qoıǵan saýaly da bar.
«Ekonomıkany damytýdyń basty qaınar kózi - adam. Sol adamdy dúnıege ákeletin názik jandy áıelder. Memlekettiń basty qundylyǵy - adamdy dúnıege ákeletin áıelderge memlekettik deńgeıde qamqorlyq jasap, olardyń jan dúnıesin aıalap, densaýlyǵyna mán berý – basty mindet! Kórshi Reseıde ana kapıtalynyń somasy birinshi balaǵa – 639 myń rýbl nemese shamamen 3 mln 195 myń teńgege, ekinshi balaǵa – 883 myń rýbl nemese 7 mln teńgege teń. Muny qazaqstandyq járdemaqymen salystyrýǵa kele me? Árıne, joq. Qazaqstanǵa da laıyqty, ádiletti analyq kapıtaldy jasaqtaıtyn ýaqyt jetti, bul kezek kúttirmeıtin másele», degen edi depýtat.
Májilismender kórshiles Reseıdegi «ana kapıtaly» sekildi kómekpen qosa, kópbalaly analardyń tisin emdeýge de qarjy bólý máselesin qozǵaǵan bolatyn.
«Elimizde uzaq merzimdi demografııany qamtý strategııasynyń bas aspektisi - laıyqty ana kapıtalyn qalyptastyrý. Ana júkti bolǵan kezde qursaqta balanyń qalyptasýyna kalsııdi kóptep jumsap, óziniń tisinen aıyrylatyndyǵy medısınalyq fakt. Qazaqstanda stomatologııalyq qyzmet aqysy kúıip turǵany barshamyzǵa belgili. Sondyqtan birinshi kezekte kópbalaly zárý analarǵa tisin jóndeý úshin birrettik qarjylyq tólem qalyptastyrý mańyzdy. Bala tapqan kelinshekterdiń densaýlyǵyn kútip, qalpynda ustap otyrýdyń memlekettik standarttaryn ázirleý kerek», dedi Erlan Saırov.
Depýtattar saýalyna jaýap bergen Premer-mınıstrdiń orynbasary Qazaqstandaǵy áleýmettik járdemaqylardyń edáýir tıimdiligin alǵa tartty.
«Reseıdiń ana kapıtaly degeni turaqty tetik emes, ýaqytsha shara bolyp tabylady jáne halyqtyń týý kórsetkishin ósirý úshin júzege asyrylady. Ol tólem sertıfıkat túrinde rásimdeledi jáne ony ata-anasy bala 3 jasqa tolǵannan keıin ǵana belgili bir maqsattarǵa – tek turǵyn úı satyp alýǵa, ne balanyń bilim alýyna jumsaı alady. Alaıda analyq kapıtaldy paıdalanýy úshin tólem qabilettiligin rastaýy qajet. Bizdiń elimizde qarastyrylǵan járdemaqynyń Reseıdegi júıeden aıyrmashylyǵy sol, Qazaqstanda tólem anaǵa aı saıyn tólenedi jáne ony qoldaný baǵytynda eshqandaı shekteý joq. Mysaly, 2024 jyly 4 balasy bar otbasyna aı saıyn 59 183 teńge tólenip turady. Sonda orta eseppen 18 jylda, ıaǵnı bala kámelettik jasqa tolǵanǵa deıin onyń anasyna bıýdjetten jalpy somasy kem degende 12,8 mıllıon teńge beriledi. Bul – kórshi eldiń tólemaqysynan birneshe esege artyq! Áldeqaıda tıimdi, ári járdemaqy tólemderiniń ýaqytyly ári turaqty tólenetinine kepildik berilgen», delingen Tamara Dúısenovanyń jaýabynda.
Sondaı-aq ol kópbalaly analardyń tisin emdeýge birrettik tólem qarastyrý máselesi de Úkimet tarapynan quptalmaıtynyn atap ótti.
