Chaıkovskıı atyndaǵy mýzykalyq kolledjiniń túlegi shekara asyp, tájirıbe jınap, qazir Taıaý Shyǵystaǵy bedeldi orkestrlerge sabaq beredi. 9 jasynan mýzykaǵa qumar alt aspabynyń sheberi Omannyń áıdik óner ordasynda shákirt daıarlaıdy. Maskatta eki jyldaı eńbek etken mýzykant jergilikti jas ónerpazdarǵa birden unapty.
«Meni Omanda jyly shyraımen qarsy aldy. Kele salǵanymda oqýǵa qushtar stýdentter birden sabaq kestelerine dáristerimdi surap engizip, dereý iske kirisip kettik. Bul jaqtyń mýzykanttary Qazaqstannyń qaıda ekenin, úlken terrıtorııaǵa ıe ekenin biledi. Biraq baryp kórmegen. Men de qonaqjaılyq tanytyp, elge shaqyryp turamyn. Arasynda elimiz týraly tanymdyq vıdeolar kórsetemin. Olar tumsa tabıǵatymyzǵa qatty qyzyǵady», deıdi Oman sultandyǵy fılarmonııa orkestriniń oqytýshysy Sáken Berǵalıev.
Oman sultanynyń qoldaýymen qurylǵan orkestrde 300-ge jýyq adam óner kórsetedi. Sonyń ishindegi qońyr úndi alt aspabynda 20-ǵa jýyq shákirt Sákennen sabaq alady. «Máskeý, Manchester, Venada óner kórsetip, sheberligin shyńdaǵan pedagogten úırenerimiz kóp», deıdi olar.
«Ustazymnyń keıingi bir jylda bergen sabaǵy – men úshin úlken mártebe ári zor qurmet. Osy ýaqyt ishinde aspaptaǵy oryndaýshylyq sheberligim jyldam shyńdalyp, qatelikterim túzeldi. Mundaı jetistikke tez jetkenime keıde ózim de tańǵalamyn. Ustazym aıtpaqshy, tabandy eńbek basty qaǵıdama aınaldy», deıdi orkestr múshesi Asıl ál-Hasanı.
Búginde otandasymyzdyń oqýshylary Germanııada, Taıaý Shyǵystyń birshama elinde óner kórsetip úlgergen. Repertýarlarynda Gaıdn men Mendelsonnyń shyǵarmalarymen qatar arab-parsy halyqtarynyń týyndylary bar. Bolashaqta qazaq klassıkteriniń kompozısııalary da Oman konsertterinde oryndalýy bek múmkin.
«Bizdiń elde de talantty kompozıtorlar jeterlik. Múmkindiginshe olardyń da mýzykasyn shákirtterime úıretýge tyrysamyn. Olarǵa notalaryn bergen sátten-aq zor qyzyǵýshylyqpen kóńil aýdarady. О́zim oınaǵanymda uıyp tyńdaıdy. Tipti úırenip alýǵa talaptanatyndar bar», deıdi Sáken.
Omandaǵy qazaq oqytýshysy shákirtteriniń ónerge degen yqylasyn odan ári eseleýdi maqsat etedi. Qazaq mýzyka mektebi ókiliniń bilimi áli talaı talanttyń baǵyn ashary sózsiz.
