Qostanaıda jasotandyqtar soǵys ardagerlerine kómekke bardy

QOSTANAI. 16 qańtar. «Nur Otan» partııasy Qostanaı obylstyq fılıaly «Jas Otan» jastar qanatynyń eriktileri borannan keıin ardagerler úıin qardan tazartýǵa bardy. Bul týraly egemen.kz habarlady. «Jastar - Otanǵa!» partııa jobasy aıasynda ardagerlerge qamqorlyq kórsetip kele jatqan eriktiler Fedor Pavlovıch Melnıkov qarııanyń aýlasyn qardan tazalady. Úrip jaýǵan qar úıin kómip qalǵan qart úshin bul kútpegen syı boldy. О́ıtkeni aýlany qardan tazalaý 91 jastaǵy kisi úshin óte aýyr jumys edi. Onymen birge turatyn jubaıy da, qyzy da jastardyń bul kómegine sheksiz rızashylyq bildirdi. Al medısınalyq kolledjdiń stýdentteri ardagerdiń densaýlyǵyn tekserdi. Fedor Melnıkov 1943 jyly 17 jasynda Qyzyl ásker qataryna shaqyrylyp, ekinshi Ýkraına maıdanynda soǵysty. Soǵystan keıin 1947 jyly Qorǵan oblysynan Qostanaı oblysy Mendiqara aýdanynyń Qaratal aýylyna qonys aýdarǵan. Sol ýaqytta traktorshy-mehanızator bolyp eńbek etti. 1981 jyly zeınetke shyǵyp, Qostanaı qalasyna kóship keldi. Uly Otan soǵysynyń ardageri Fedor Melnıkov: «Men Harkov janyndaǵy Chýgýn qalasyn azat etýge qatysyp, Dnepr ózenine deıin jettim. Surapyl urysta jaralanyp, gospıtalǵa tústim. «Ýkraınany azat etkeni úshin», «Erligi úshin» jáne taǵy basqa medalderim bar. Sol surapyl kezdi eske alǵym kelmeıdi. Árdaıym jer betinde beıbitshilik pen tynyshtyq bolsyn dep tileımin», – deıdi. Medısınalyq kolledj stýdentteri qarııanyń densaýlyǵyn qarap, qan qysymyn, qandaǵy holesterın mólsherin tekserdi. Jasotandyqtar árdaıym qarttarǵa, Uly Otan soǵysynyń jáne tyl ardagerlerine kóńil bólip keledi. Olar qarttardy qurmettep, urpaqtar arasyndaǵy sabaqtastyqty jalǵaýdy ádetke aınaldyrǵan. «Jas Otan» jastar qanatynyń joba úılestirýshisi Máýlen Ordabaev: «Búgin «Jastar – Otanǵa!» jobasy aıasynda Qostanaı oblysy boıynsha barlyq aýdan men qalalarda eriktiler ardagerlerge qar tazalaýǵa kómektesýde. Bul shara qystyń sońyna deıin jalǵasady. Biz apta saıyn olarǵa habarlasyp, hal-jaǵdaılaryn bilip turamyz», – deıdi. Názıra Járimbetova. Derek, sýret: egemen.kz.