«Alǵash ret 2019 jyly Orynbor oblystyq memlekettik arhıvine baryp, 1742 jyly Orynbor general-gýbernatory Neplıýevtiń qupııa keńesshisi jazǵan hattaryn taptyq. Munda Ábilqaıyr hannyń esimi atalǵan. Or qalasyn salý jóninde áńgime bolady. Qujat eski keńse tilinde jazylǵandyqtan, oqý qıyn. Kóshirmelerin túsirip, ǵylymı aınalymǵa jiberdik. Osy jerdegi qazaq tarıhyna qatysty, ásirese Kishi júzdiń sultandary týraly sońǵy qujat 1918 jyly tirkelgen», deıdi Aqtóbe oblystyq memlekettik muraǵaty dırektorynyń orynbasary Svetlana Knıjnık.
2022 jyly Bashqurtstan Respýblıkasy Ulttyq memlekettik arhıvinen Ybyraı Altynsarınniń Aqtóbedegi eki basqyshtyq ýchılıshe janynan qolóner, teri óńdeýdi úıretetin bólimshe ashý týraly Orynbor oqý okrýgi qorǵanshylyq keńesine jazǵan hattary tabyldy. Taǵy bir mańyzdy qujat – Ýfadaǵy «Ǵalııa» medresesi shákirtteriniń tańǵy jattyǵý kezi, ustazdarynyń top bolyp túsken fotosýretteri. Eń qundysy «Ǵalııada oqyp jatqan bir top qazaq shákirtteriniń 1916 jyly túsirilgen fotosýreti dep aıtýǵa bolady. О́te sándi kıinip, bastaryna taqııa kıgen on alty shákirt eki qatar bolyp túsken. Birinshi qatarda sol jaq shette otyrǵan jazýshy Jıenǵalı Tilepbergenov. Ol «Ǵalııada» oqyp júrgende, stýdent jastardyń «Sadaq» qoljazba jýrnalyn shyǵarǵan. Fotosýret astyndaǵy túsinikteme keıin jazylǵan. Bir nazar aýdararlyǵy, tómengi qatarda altynshy bolyp otyrǵan jigitti «Mustafa Shoqaı» dep kórsetken. Anyqtap qaraǵanda, ol Shoqaıǵa uqsamaıdy. Jalpy, bul sýrettegi azamattardy kim biledi eken? Bálkim tóńkeris aldynda oqyǵan muǵalimderdiń urpaqtary tanyp qalar. Jıenǵalı Tilepbergenovtiń janynda otyrǵan jigit keıin Lenın ordenin ıelengen, Qazaq KSR-niń eńbek sińirgen muǵalimi Zeınelǵabıden Imanjanov dep jazylǵan. Qasyndaǵylar –ustaz Hamza Ibragımov, Haqan Erejepov dep kórsetilgen.
Fotosýrettegi on alty jigittiń taǵdyry keıin qalaı órildi eken?
Aqtóbe oblysy
