Sýretti túsirgen – Erlan OMAR, «EQ»
Respýblıkalyq «Taza Qazaqstan» aksııasy bastalǵaly oǵan 1 mln-nan asa adam qatysyp, 5 myńnan astam shara uıymdastyrylypty. Aksııanyń aty aıtyp turǵandaı, onyń maqsaty – azamattardy óz qalasy men aýylyn, aýlasyn taza ustap, kóshet otyrǵyzýǵa úndeý.
«Shyn máninde, elimizdi kógaldandyrý, abattandyrý – úlken memlekettik mańyzy bar is. Bul búgin shyǵyp, erteń umytyp ketetin birrettik naýqan emes. Atalǵan jumys turaqty túrde júrgiziledi. Týǵan jerimizdi taza ustaýymyz kerek. Bul – jalpyulttyq másele», degen edi Prezıdent.
Rasynda, turmystyq qaldyqtar men kúl-qoqys tumsa tabıǵatty tunshyqtyryp barady. Buǵan zaýyt-fabrıkalardan shyǵatyn ýly hımııalyq qaldyq sýlardy qosyńyz. Burysh-buryshqa, qýys-qýysqa kózińiz tússe, jelmen jelpildegen sellofandar men qaýdyrlaı ushqan plastmass qutylar qutyńyzdy qashyrady. Shyny kerek, shylym tuqylynyń da shashylyp jatpaıtyn jeri joq. Aspannan burshaq jaýǵandaı ala jańqa bolyp jatqanyn kóremiz. Oǵan da kóbimiz qosqan úlesimizdiń bary ras. Qalamyz da, dalamyz da qoqysqa kende emes. Qoqysty qaıta óńdep, kádege jaratýdy qolǵa alǵanymyzǵa biraz jyldyń júzi boldy. Bul da jetkiliksizdeý túskeni ras. Osy rette «Taza Qazaqstan» ekologııalyq aksııasy der shaǵynda qolǵa alynǵan bastama ekenin aıta ketken jón.
Rasynda bul birrettik naýqan emes, muny – halyqtyń ekologııalyq mádenı sanasyn qalyptastyratyn ulttyq ıdeıa dep túsinýge bolady. Buǵan Prezıdenttiń ózi zor mańyz berip otyrýy da osydan bolsa kerek. О́ıtkeni sana tazarmaı, qala da, dala da tazarmasy anyq.
