SENIM DAǴDARYSY – QAÝIPSIZDIKKE TО́NGEN QATER

Osy kúnderi Vena qalasynda EQYU-nyń Qaýipsizdik salasyn­daǵy problemalarǵa sholý boıyn­sha jyl saıynǵy konferen­sııasy­nyń ótip jatqany týraly budan buryn habarlaǵan bolatyn­byz. Bul mańyzdy forýmnyń ashylý rásiminde elimiz Syrtqy ister mınıstriniń orynbasary Konstantın Jıgalov sóz sóıledi. Onyń aıtýynsha, búginde EQYU óńiri betpe-bet kelip otyrǵan qaýip­sizdik salasyndaǵy problema­lardyń negizinde senim daǵdarysy jatyr. “Biz ózimizdiń basty prob­lemamyzdy senim daǵdarysynan kórip otyrmyz. Qarý-jaraqqa baqylaý rejiminiń irip-shirýi, sozylmaly daǵdarystardyń she­shil­meýi, EQYU mıssııasynyń Grýzııada qalpyna keltirilý úderi­sindegi progrestiń joqtyǵy – osy konferensııa barysynda talqy­lanatyn negizgi máseleler. Jáne olardyń bári de senim daǵdarysy aıqyn kórinis bergenin qýattaı­dy”, – dedi K.Jıgalov. EQYU-nyń Is basyndaǵy tóraǵasy retinde biz ózimizdiń ne­gizgi mindetimizdi Uıymǵa qaty­sýshy elderdiń ustanymyn jaqyn­das­tyrýda jáne jalpyǵa ortaq beı­bitshilik pen qaýipsizdik múddesi turǵysynan ózara qabyldanatyn sheshimderdi izdestirýde dep biletinimizdi de Qazaqstan Syrtqy ister mınıstriniń orynbasary aıtyp ótti. EQYU-nyń 1999 jylǵy Vena qujatyn jańartý jónindegi jumys bastalyp, ol EQYU elderiniń se­nim deńgeıin jáne ózara yntymaq­tastyqtyń tıimdiligin eleýli túrde arttyrady degen úmit artylady. Vena qujaty senim men qaýip­sizdikti nyǵaıtý sharalaryna qa­tys­ty bolǵandyqtan, ol Uıymǵa múshe memleketterden qarýly kúshter men áskerı qyzmet týraly aqparat almasýdy talap etedi. K.Jıgalov EQYU-nyń “Kor­fý úderisi” degen atpen belgili bo­la­shaq eýropalyq qaýipsizdik týra­ly únqatysý kooperatıvtik rýhty qalpyna keltirý úshin bire­geı múmkindik bolyp tabyla­ty­nyna jáne qazaqstandyq tóraǵa­lyq osy únqatysý men EQYU qyzmetiniń aıasynda ózara túsinis­tiktiń joǵary deńgeıine qol jet­kizý múmkindigi bar ekenin atap kórsetkenine toq­tal­dy. Mundaı múmkindikti Reseı men Qurama Shtattar arasynda Iаdrolyq qarý-jaraqty qysqartýǵa baılanysty jańasha shartpen jumys isteý kezinde qol jetkizil­gen ózara túsinistik qýattaı túsedi. О́tip jatqan konferensııa Korfý úderisine járdemdesetini sózsiz, bul taqyryp EQYU-nyń syrt­qy ister mınıstrleriniń beıresmı kezdesýinde talqylana­tyn bolady. Ol shilde aıynyń ortasynda Qazaqstannyń Almaty qalasynda ótedi. Konferensııada Qyrǵyzstan­daǵy daǵdarys týraly aıtylǵanda jınalǵandar onda adamdardyń opat bolýyna baılanysty kóńil aıtyp, “EQYU-nyń ahýaldy turaq­tandyrý jónindegi kúsh-jige­rin belsendi úılestirý mańyzdy” ekendigi atap ótildi. Grýzııaǵa baılanysty máseleni talqylaý barysynda K.Jıgalov EQYU-nyń óńirdegi rólin qoldaý bildirý tobyn qurý jolymen kú­sheı­tý kerektigin atap ótti. “EQYU-nyń Grýzııada bolýyn qalpyna kel­tirý máselesi sózsiz mańyzdy bolyp tabylady”, – dep K.Jıgalov. Jumys sessııalary barysynda transulttyq qaýip-qaterler men synaqtar, EQYU-nyń daǵdarys­­tyń erte bastan aldyn alý, jol bermeý jáne retteýdegi róli, daǵ­darys jaǵdaılaryndaǵy basqarý jáne qaqtyǵystan keıingi qalpyna keltirý sekildi máselelerge aıryq­sha nazar aýdaryldy. Kún tár­tibindegi máselelerdi talqylaý barysynda Aýǵanstanǵa qatysty taqyryptar da kóterildi. Talǵat JUMAǴULOV, “Egemen Qazaqstan” – Venadan. Sýretti túsirgen Sıýzanna LOF.