Robot-saýsaq adam saýsaǵyna uqsaıdy ári qozǵalady. Ǵalymdar deneniń táýelsiz bólikteri mıdyń qozǵalystaryna qalaı jaýap beretinin anyqtaǵysy kelgen. Kembrıdj ǵalymdary bes kún ishinde testileýge ártúrli demografııalyq toptardan 3 pen 96 jas aralyǵyndaǵy 596 adam qatystyrǵan. Tek tórteýi ǵana qurylǵyny paıdalana almady, sebebi qolyna sáıkes kelmedi. Al qalǵandary ońaı ıkemdelip ketti. Zertteý kórsetkendeı, adam jasandy saýsaqty kıse, zattardy ońaı alady, jumysty tez isteıdi. Sebebi mı jasandy aıaq-qoldardy deneniń qarapaıym bólikteri retinde qabyldaıdy. Bolashaqta bul dúnıe satylymǵa shyqsa, tańǵalmańyz.
Kermege keremet tartylady
Gınnestiń rekordtar kitabyna engen taǵy bir otandasymyz týraly sóz qozǵamaqpyz. Ol – Shahtınsk qalasynyń turǵyny Rýslan Fatahov. Kermege tartylýdan bes jańa rekord ornatyp, álemdi tańǵaldyrǵan.
Rýslan alǵashynda grek-rım kúresin jaqsy kórgen. 16 jasynda strıtlıftıngpen aınalysyp bastaǵan. Sodan Gınnestiń rekordtar kitabyna «qosymsha salmaqpen tartylý» atalymyna ótinim bergen. Osy atalymdaǵy barlyq jeti rekordty jańartamyn dep maqsat qoıǵan. Qajyrly jigit qalaýyna jetken. «Sport – meniń ómir saltym. Jeńiske jetkendi, birinshi bolǵandy jaqsy kóremin. Strıtlıftıng – óz-ózińmen kúresý. Basynda artyq salmaqpen kóterile almadym, biraq aýyr jattyǵýlar óz nátıjesin berdi. Tipti dene salmaǵyma +32 kılo kermede tartylýda álem chempıony atandym. Chempıonat Kıevte ótti», dedi Rýslan.
Serýendep júrip, tırannozavr tapqan
Dala kezip júrip, qundy zat taýyp alatyndar týraly jıi estımiz. Al myna otbasy serýendep júrip, tırannozavrdyń súıekterin taýyp alǵan.
Bul oqıǵa bylaı bolǵan desedi. 45 jastaǵy Sem Fısher eki uly men jıenin 2022 jyldyń shildesinde Soltústik Dakotadaǵy Badlends ulttyq saıabaǵyna shaǵyn serýenge aparǵan. Serýendep júrip, 12 jasar Djessı, toǵyz jasar Lıam jáne 11 jasar Keıden bir qyzyqqa tap bolady. Bir aǵarańdaǵan úlken dúnıeniń ushyn kórip, qaza bastaıdy. Sóıtse, ol tırannozavrdyń súıekteri bolyp shyqqan. Uldar qundy nárse tapqanyn túsingennen keıin birden ákesine habarlaıdy. Solaı ǵasyrlardy eńsergen súıekter murajaıǵa tapsyrylyp, kórermen kózaıymyna aınalǵan.
