Boks. «Arlandar» alǵash ret jeńildi

ASTANA. 26 sáýir. Búkilálemdik boks serııasynda (WSB) el namysyn qorǵaıtyn «Astana arlandary» bıylǵy maýsymda alǵash ret qarsylasyna ese jiberdi. Keshe túnde Italııa boksshylaryna qarsy judyryqtasqan olar 2:3 esebimen jeńildi. Bul týraly egemen.kz habarlady. Aıqas Italııanyń Bergamo qalasynda ótti. 69 kg.-da baq synaǵan «arlanymyz» Aslanbek Shymbergenov qarsylasynan basym tússe, asa aýyr salmaqtaǵy (+91 kg.) boksshymyz Fılıpp Hrgovıch kezekti ret nokaýtpen jeńiske jetti. Al qalǵan úsh sportshymyz qarsylastaryna ese jiberip, «Astana arlandary» WSB jobasynyń bıylǵy maýsymynda alǵash ret jeńildi. Bul – toptyq kezeńdegi sońǵy kezdesý ekenin aıta keteıik. «Italııa tander» – «Astana arlandary» 3:2 52 kg. Gaýrav Bıdhýrı – Mıras Jaqypov 2:1 (48:47, 48:47, 45:50). 60 kg. Donato Kozensa – Roman Shegrınov 3:0 (48:47, 49:46, 48:47). 69 kg. Adam Patrık Nolan – Aslanbek Shymbergenov 0:3 (47:48, 46:49, 47:48). 81 kg. Valentıno Manfredonıa – Hrvoe Sep 3:0 (49:46, 48:47, 48:47). +91 kg. Alessıo Spahıý – Fılıpp Hrgovıch. TKO R2 Búginge deıingi 13 matchtyń barlyǵynda jeńiske jetken Marat Jákıevtiń shákirtteri óz tobynda 39 upaımen birinshi oryn aldy. Sondaı-aq, bizdiń komandanyń jartylaı fınal joldamasyn ıemdenip qoıǵany belgili. Elaman Qońyr. Derek: egemen.kz. Sýret: vesti.kz.