Qanat Myrzalymulynyń sharapatyn kórgen júzdegen jannyń biri – Qostanaı qalalyq meshitiniń bas ımamy, qoǵamǵa paıdaly talaı ıgi istiń basy-qasynan tabylyp júrgen óńirge belgili óreli azamat Shoqan qajy Ǵazızuly.
«Men Qanat aǵanyń aldynda alty aı jatyp emdeldim. Birinshi Qudaıdyń, ekinshi sol kisiniń sharapatymen qazir, jer betin basyp, shapqylap júrip jatyrmyz. Qanat Myrzalymulynyń esimin bala kezimizden estip óstik. Ol kisi Torǵaı óńirindegi Aqshyǵanaq eldi mekeninde týǵan. Kezinde Jangeldın aýdanynyń hırýrgııa bólimin basqarǵan ataqty dáriger Asqar Baıjumanov degen aǵamyz bolǵan. Bizdiń bala kezimizde ákelerimiz, eldiń úlken aqsaqaldary sol kezde qylshyldap turǵan jap-jas Qanat aǵamyzǵa rızashylyǵyn bildirip, syrttaı batasyn berip «Asqardyń izbasary, bas shákirti» dep otyratyn. Shynynda da, Qanat Myrzalymuly Asqar aǵanyń qasynda júrip, biraz tájirıbe jıdy. Kezinde Torǵaı oblystyq aýrýhanasynyń hırýrgııa bólimin basqardy. Qazir, mine, Qostanaı oblysynyń bas hırýrgi retinde dárigerlerdiń birneshe býynyn tárbıelep otyr. О́zimniń alty aı aýyryp jatqanym kóz aldymda, ol kiside senbi, jeksenbi degen joq, tańǵy saǵat 6.30, 7-ge jetpeı keledi de, búkil bólimdi aralap, árbir naýqastyń janyna baryp, hal-jaǵdaıyn surap ketetin. Meniń endi qaraıyp ketken 2 metr ishegimdi alyp tastady. О́zim, otbasym, áýletim, maǵan tileýles kóptegen kisiler qorqyp, qıyn bir kezeńdi bastan keshirdi. 3 metr ishegimnen 1-aq metr qalǵan eken, Qanat Myrzalymuly sony qaıtyp jalǵap, adam qataryna qosty. Men sol alty aı aýrýhanada jatqanda memlekettiń medısına salasyna basa kóńil bólý kerektigine ábden kózim jetti. О́ıtkeni dárigerler tańnyń atysy, kúnniń batysy adam janyn arashalaımyn dep arpalysyp júredi. Meıirgerlerdiń de eńbegi orasan. Olardyń jankeshti eńbegi elený kerek. Mysaly, Qanat aǵa kúnine 3-4 operasııadan shyǵyp, qansha sharshap tursa da, palatadaǵy naýqastardyń amandyǵyn bilip ketedi. Sonda sharshaǵany qyzarǵan kózinen, balbyrap, bop-boz bolyp turatyn betinen ǵana bilinetin», deıdi Shoqan qajy Ǵazıuly.
Oblystyq aýrýhananyń hırýrgııa bólimine ekibastan ahýaly qıyn naýqastar keledi. Qanat Myrzalymuly operasııa jasaýǵa kelmeıtin, bolmasa operasııadan keıin jarasy asqynyp ketken naýqastarǵa ózi qaıta operasııa jasaıdy. Keıingi kezde oblystyq hırýrgııa bóliminiń mamandary beınehırýrgııa, endoskopııalyq hırýrgııaǵa kóshe bastaǵan.
«Baýyrǵa, ót joldaryna, asqazan jaryǵyna, sosyn ish qýysy men keýde qýysynyń ortasyndaǵy kók ettiń óńesh ótetin tesiginde jaryq bolady, soǵan operasııa jasaýdy keńinen qoldanyp júrmiz. Endi asqynǵan aýrýlardyń kóbine jedel operasııa jasaımyz. Sosyn bizde josparly operasııalar bolady. Kúnine 4-5 operasııa jasaımyz. Onyń qıyndaýyna men ekibastan ózim baramyn. Odan keıin ósip kele jatqan shákirtterim bar, solarǵa kómektesip, solardy tárbıelep, barymyzdy salyp jumys istep kelemiz. Aı saıyn orta eseppen 150-den astam pasıentti emdeımiz», deıdi el alǵysyna bólengen dáriger.
Qostanaı oblysy
