Bir sát sýretke zer salyńyz. Fotoda Nurtas atamyzdyń Qazaq KSR Mınıstrler keńesiniń tóraǵasy kezi. Qasynda ataqty ǵalym, akademık Qanysh Sátbaev. Belgili jýrnalıst, ońdasynovtanýshy Gúlsim Orazalyqyzynyń aıtýynsha, munda eki alyptyń Almatydaǵy Qazaqstan ǵylym akademııasy ǵımaratyn salatyn oryndy arhıtektor, qurylysshylarmen talqylap turǵan sáti beınelengen.
Nurtas Ońdasynov – el úkimetin óte qıyn jyldary basqardy. Sol qıyndyqqa qaramastan kóptegen jańashyl iske bastamashy boldy. Qaıratkerdiń tikeleı qoldaýymen Qazaqstan Ǵylym akademııasy quryldy. Soǵys bolyp jatqan aýyr kezeńde Ǵylym akademııasynyń jańa ǵımaratyn salýǵa qarjy bóldi. Ardaqty azamat akademııa ǵımaratynyń irgetasy qalanǵanda yrymdap, «Qazaq ǵylymy kúmisteı taza bolsyn» dep kúmis tıyn shashypty desedi.
Bıyl Ulttyq ǵylym akademııasynyń alǵashqy prezıdenti Q.Sátbaevtyń týǵanyna da 125 jyl toldy. Soǵan oraı 12 sáýirde elordadaǵy L.N.Gýmılev atyndaǵy Eýrazııa ulttyq ýnıversıtetinde halyqaralyq ǵylymı konferensııa ótti. Sonda Parlament Senatynyń depýtaty, Halyqaralyq Q.Sátbaev qory qamqorshylyq keńesiniń tóraǵasy Altynbek Nuhuly kórnekti ǵalymdy Jezqazǵannan ǵylymǵa ákelgen, sol jyldardaǵy úkimet basshysy Nurtas Ońdasynov dep, ol kisiniń eńbegine joǵary baǵa berdi. Shynynda, birtýar tulǵa Q.Sátbaevtyń gazetke shyqqan maqalasyn oqyp, ǵalymnyń tereń oıy men sózin unatyp, ony Máskeýge shaqyrady. Kezdesip sóıleskennen keıin KSRO Ǵylym akademııasynyń prezıdenti V.L.Komarovqa alyp baryp: «Qazaqtyń Ǵylym akademııasynyń bolashaq prezıdenti bolýǵa laıyq jigit», dep tanystyrǵan eken. Bul – el erteńin oılaǵan qaıratkerdiń eleýli qasıeti.
