Foto: egemen.kz/ Erlan Omar
Kezdesýde kólik jáne qarjy salasynda jumys isteıtin mamandardy daıarlaý, quziretin arttyrý tetikteri saralandy.
Kólik vıse-mınıstri Sátjan Ablalıev vedomstvo janynan 6 salalyq keńes jumys isteıtinin aıtty. Olar temirjol, sý, avtomobıl kóligi jáne joldar, sondaı-aq azamattyq avıasııa salalaryn qamtıdy. Keńes qazirdiń ózinde 711 kásipti qamtıtyn 101 kásibı standartty ázirlegen. Bıyl jańa 19 standart ázirlenip, 31-in ózektendirý josparlanyp otyr.
Kólik mınıstrliginiń boljamyna sáıkes, 2030 jylǵa deıin atalǵan salalarǵa 8,8 myńǵa jýyq maman qajet bolady. Qazir kadrlar 49 joǵary oqý oryndarynda jáne 280-nen astam kolledjderde daıarlanyp jatyr. Vıse-mınıstr oqý oryndarynyń sany kóp kóringenimen, keıbir mamandyqtar boıynsha mysaly, kópirler men temirjoldar qurylysy boıynsha oqıtyn stýdentter az ekenin atap ótti. Sondyqtan Ǵylym jáne joǵary bilim mınıstrligimen birlesip granttardy qaıta bólý máselesi kún tártibine qoıylmaq.
Qarjy vıse-mınıstri Dáýren Keńbeıildiń málimetinshe, jetekshilik etetin salada «býhgalter» mamandyǵy boıynsha bir kásibı standart paıdalanylady. Bul retter ASSA (Association of chartered certified accountants) halyqaralyq biliktiligi boıynsha stýdentterdi oqytý jáne sertıfıkattaý máselesi qarastyrylyp jatyr. Osylaısha, dıplom alǵan jáne óz biliktiligin rastaǵan túlekterdi jumysqa ornalastyrý prosesi jeńildeıdi.
«Sertıfıkat táýelsiz ortalyqtar tarapynan berilýi mańyzdy. Ol boıynsha jumys berýshiniń maman biliktiligine qatysty pikiri qalyptasady. Oqý ornynyń ımıdji de osyǵan tikeleı baılanysty. Bir sózben aıtqanda, biz osy nemese basqa mamandyqty ıgerip jatqan azamatty sapaly jumys ornymen qamtamasyz etý úshin jaǵdaı jasaýymyz kerek», dedi Tamara Dúısenova.
