Foto: Vıdeoskrın. Oblystyń TJ jónindegi jedel shtaby
25 mamyrda Taldykól aýylyna tolyq evakýasııa jarııalanǵan ýaqytta, TJM, áskerıler jáne jergilikti azamattardyń as-sýyn daıyndaý úshin 10-ǵa jýyq áıel adam óz erikterimen suranyp, aýylda qaldy. Olar balabaqsha ashanasynda tamaq daıyndady. Qıyn kezde erliktiń úlgisin kórsetkenderdiń qatarynda Qanaǵat О́tepqalıeva da bar.
«Tasqyn bolatyny týraly sáýirde estidik. Internette tipti «búkil aýyldy sý basyp ketedi» degen de jazba tarap jatty. Bastapqyda úreı boldy. Biraq qorqynyshqa boı aldyrmaı, aýylymyzdy saqtap qalýǵa sál de bolsa úles qosýǵa tıispiz dep sheshtik. Osylaısha, aýyl turǵyndary birlesip, jaǵa nyǵaıtý jumystaryna kiristik. TJM mamandary, áskerıler kómekke keldi. Keıin áıel azamattar jaǵa bekitip júrgen erlerdi táýlik boıy ystyq taǵammen qamtyp, ýaqytpen sanaspaı aýyldy saqtaýǵa jumyldyq. Daýryǵyp, úreıge boı aldyrǵan bolsaq, aýylymyzdy saqtap qala almas ta edik. Tilsiz jaýdy halyqtyń birligi jeńdi. Araǵa 30 jyl salyp kelgen mol sý – syn saǵatta birige bilgen halyqtyń erligi urpaqqa ósıet etetin tarıhı sát boldy», deıdi Taldykól aýyly turǵyny Qanaǵat О́tepqalıeva.
Eske salaıyq, Mahambet aýdany, Beıbarys selolyq okrýgine qarasty Taldykól tasqyn qaýpi tóngen aýyldyń biri. Tasqynnan qorǵaný úshin aýylǵa 3 shaqyrymdyq qorǵanys bógeti soǵyldy.
