Q.Toqaev Seýl Astananyń Azııa-Tynyq muhıty aımaǵyndaǵy mańyzdy strategııalyq seriktesteriniń biri ekenin aıta kelip: «Koreıa syrtqy saýda aınalymy boıynsha tórtinshi orynda jáne Qazaqstannyń eń iri sheteldik ınvestorlarynyń ondyǵyna kiredi. Ońtústik Koreıa álemdik aýqymda naǵyz ekonomıkalyq jáne tehnologııalyq lokomotıvke aınaldy», dep atap ótti.
«Qazaqstanda Ońtústik Koreıa kapıtaly bar 700-den astam kompanııa tabysty jumys isteıdi. Elimizde 120 myń etnostyq koreı mańyzdy ról atqarady jáne bizdiń qarym-qatynasymyzdy nyǵaıtýǵa baǵa jetpes úles qosady. О́z kezeginde Koreıada oqıtyn myńnan astam qazaqstandyq stýdent – elderimiz arasyndaǵy «dostyqtyń altyn kópiri», dedi Prezıdent.
Sonymen qatar, kelissózder barysynda prezıdentter energetıka, ınfraqurylym jáne ónerkásip, mashına jasaý, saýda, kólik jáne logıstıka, sıfrlandyrý jáne aeroǵarysh salalary, qarjy sektory, bilim, densaýlyq saqtaý jáne farmasevtıka, týrızm jáne mádenıet, ekologııa jáne basqa da salalardaǵy ekijaqty yntymaqtastyqty talqylady.
Paıdaly qazbalardy birlese ıgerý tetigi
Ońtústik Koreıa Prezıdenti Iýn Sok Iol men Qazaqstan Prezıdenti Qasym-Jomart Toqaev Astanada ótken kelissózder barysynda mańyzdy paıdaly qazbalardy barlaý men ıgerýde ekijaqty yntymaqtastyqty nyǵaıtýǵa kelisti.
Qazaqstan men Ońtústik Koreıa eki el arasyndaǵy strategııalyq áriptestikti tereńdetý boıynsha О́zara túsinistik týraly memorandýmǵa, sondaı-aq paıdaly qazbalardy jetkizý tizbegin qurý týraly qujatqa qol qoıdy.
Q.Toqaev Qazaqstan naryǵyna kirgisi keletin koreı kompanııalaryna qolaıly jaǵdaı jasaýǵa daıyn ekenine nazar aýdardy. Prezıdenttiń pikirinshe, muny júzege asyrýdyń aıqyn joldary bar. Úkimetaralyq komıssııa, Iskerlik keńes pen bıznes qaýymdastyq arasyndaǵy jumys toby qurylǵan. Bul qurylymdar ekijaqty ekonomıkalyq baılanysty nyǵaıtýǵa zor septigin tıgizedi.
Taza aýyzsýmen qamtylady
Qazaqstan 2025 jylǵa qaraı taza aýyzsýǵa tolyq qoljetimdilikti qamtamasyz etýge umtylady. Bul týraly Qazaqstan Premer-mınıstri Oljas Bektenov málimdedi.
Mundaı málimdeme qalalyq jáne aýyldyq jerlerde sýmen jabdyqtaý qyzmetterin jaqsartý máselelerin talqylaý barysynda jasaldy. О́tken jyldyń qorytyndysy boıynsha sýmen jabdyqtaý qyzmetterimen Qazaqstanda qala halqynyń 98,9%-y jáne aýyl halqynyń 96,6%-y qamtyldy.
2024 jyly sýmen jabdyqtaý jáne káriz júıelerin salýǵa, rekonstrýksııalaýǵa respýblıkalyq bıýdjetten 218 mlrd teńge kózdelgen. Bul qomaqty ınvestısııa Úkimettiń búkil el boıynsha sý ınfraqurylymyn jaqsartýǵa degen umtylysyn kórsetedi.
О́nimder Túrkııaǵa qaıta satylady
Qazaqstandyq ónimdi Túrkııa naryǵyna jetkizýge kedergi bolǵan birqatar shekteý alynyp tastaldy dep habarlady Aýyl sharýashylyǵy mınıstrliginiń baspasóz qyzmeti.
Áńgime 2005, 2016 jáne 2022 jyldary túrli aýrýlardyń sebepteri boıynsha engizilgen Qazaqstannan mal jáne qus sharýashylyǵy ónimderin jetkizýge tyıym salý týraly bolyp otyr.
Bul sheshim osy jyldyń mamyrynda Dúnıejúzilik janýarlar densaýlyǵy uıymynyń 91-sessııasynda, ekijaqty mınıstrlikaralyq kelissózderdiń nátıjesinde qabyldandy. Túrik taraby Dúnıejúzilik janýarlar densaýlyǵy uıymynyń esepterinde usynylǵan aýrýlardy joıý jónindegi Qazaqstannyń jumysyn joǵary baǵalady.
Mal sharýashylyǵy ónimderin ilgeriletýge qoıylatyn veterınarlyq talaptar Aýyl sharýashylyǵy mınıstri Aıdarbek Saparovtyń osy jyldyń tamyzynda Túrkııaǵa sapary barysynda talqylanady.
