Munaıly óńirdegi eldi mekenderdi tasqyn sýdan qorǵaýǵa Qorǵanys mınıstrligi 30212, 5571, 6655, 82796 áskerı bólimderiniń, Tótenshe jaǵdaılar mınıstrligine qarasty 52859 áskerı bólimi jáne Ulttyq ulannyń sarbazdary kómekke jetken. Mańǵystaý, Aqtóbe, Túrkistan, Almaty, Qyzylorda oblystyq, Shymkent qalalyq tótenshe jaǵdaılar departamentiniń qyzmetkerleri de járdemdesken.
Jylyoılyqtar tolassyz tasqynmen alysyp jatqan tusta asarǵa úles qosqandardyń biri – Tynyshtyqbaı Turtaev. Ol áskerılermen birge Jem boıyndaǵy alty bógetti jaryp, sý aǵysyn Kaspıı teńizine qaraı baǵyttaǵan. Sóıtip tilsiz jaýdyń qarqynyn báseńdetken. Búginde bul eńbegi elenip, «El qorǵany» medalimen marapattaldy.
– Amanatty arqalap, jerim dep jegilip, elim dep emirenip ótý – Otannyń ulandaryna artqan uly mindeti. Mine, osy qaǵıdany ustanyp, elim úshin aıanbaı eńbek etip kelemin. Atyraý oblysy Qulsary qalasynda sý tasqyny kezinde kemerinen asqan óńirdegi ózenniń aǵysyn burýǵa qol ushyn sozdyq. Topyraq toltyrylǵan qaptardy daıyndaý jáne tóseý jumystaryna qatysyp, meılinshe sýdan aman qalǵan shaǵyn aýdandardy saqtap qalýǵa atsalystyq. Sol syn saǵatta ortada júrip, ata-babamyzdan jalǵasyp kele jatqan ulttyq qundylyǵymyz – birlik pen yntymaqtyń naǵyz úlgisin kórdik. Odan árqaısymyz rýhtanyp, jigerlenip, birlik pen talapty eńbekke salǵannyń nátıjesinde asaý tolqyndy aýyzdyqtaı aldyq, – deıdi 41433 áskerı bóliminiń rota starshınasy.
«El qorǵany» medali erligimen erekshelengenderge 2017 jyldan bastap beriledi. Nagrada eki dárejeden turady. Iаǵnı I dárejeli medalimen Qazaqstan Respýblıkasynyń qorǵanys qabiletin, áskerı qaýipsizdigin nyǵaıtýǵa eleýli úles qosqan Qarýly Kúshteriniń ofıserler quramy men azamattary marapattalady. Al II dárejeli medalimen Qazaqstan Respýblıkasy Qarýly Kúshteriniń serjanttar jáne sarbazdar quramdarynyń áskerı qyzmetshileri marapattalady. Bul qurmetke tótenshe jaǵdaıdaǵy tabandy is-qımyly úshin Qýanysh Erǵalıev te ıe boldy. Batys Qazaqstan oblysynyń Bókeı Orda aýdanyna qarasty Saıqyn aýylynyń týmasy alǵash áskerı qyzmetke qalaı kelgenin eske alyp, jastardy Otan aldyndaǵy boryshyn óteýge shaqyrdy.
– Joǵary oqý ornyna grantqa túse almadym. Oılanbastan, 2005 jyly áskerı boryshymdy óteýge attandym. Sodan 2007 jylǵa deıin Almaty oblysyndaǵy Qapshaǵaı qalasyndaǵy áskerı bólimde azamattyq mindetimdi atqardym. «Armansyz adam – qanatsyz quspen teń» degen sóz bar emes pe? Sol sekildi áskerı adam bolýdy bala kezimnen armandadym. Mektepte oqyp júrgende desanttyq shabýyldarǵa qatysty túrli fılmderdi jıi kóretinmin. Ári elge qyzmet etýdi kóp armandaıtynmyn. Úıdegi úlkender de «Atańnyń balasy bolma, adamnyń balasy bol» dep jıi aıtatyn. Sodan armanym maqsatyma aınaldy. Keıin áskerı qyzmette qaldym. Mine, 20 jylǵa jýyq ýaqyt ótti, qazir ómirimdi áskerı formasyz elestete almaımyn. Jalpy, bul áskerı sala kez kelgen adamdy tártip pen tózimdilikke, batyldyqqa, shynshyldyqqa, ári sportqa jaqyn bolýǵa úıretedi. Er adam qandaı jaǵdaı bolsyn, Otan aldyndaǵy boryshyn aqtaýǵa mindetti, – deıdi Qýanysh Erǵalıev.
Rasymen, tepse temir úzetin, deni saý jigitter Otan aldyndaǵy boryshyn óteýge mindetti. Áskerge barýǵa qulyqsyz jastardyń áreketinen Prezıdent Qasym-Jomart Toqaev ta habardar. Sol sebepti jaýaptylarǵa nasıhat jumystaryn kúsheıtýdi tapsyrǵan-dy. Qazir áskerge barǵan jastarǵa birqatar jeńildik qarastyrylady. Sonyń biri – áskerı boryshyn ótep kelgen azamattar joǵary oqý ornyna jeńildikpen túsedi. Sondaı-aq merzimdi áskerı qyzmettegi sarbazdar nesıesin tóleý mindetinen ýaqytsha bosatylady. Olar ózderi qalasa, armııa qatarynan naqty mamandyq ta alyp shyǵady.
