Iá, shyn ónerde shart ta joq, shekara da joq. О́ner ataýlyǵa ereje, zańdylyq syndy qasań dúnıeler ener bolsa, shyǵarmashylyq shynaıylyǵynan, bolmysynan aıyrylary haq. Kórkemdik keńistiginiń shet-shegine kóziń jetpeıdi, tereńine oıyń boılamaıdy. Tylsym qylqalamnyń syryn tek sezgen biledi, syrly boıaýdyń tilin tek uqqan túsinedi.
Sýretshi Tilek Halınniń shyǵarmashylyq erkindigi – dala. Qylqalamynyń tynysy sol dalanyń qushaǵynda, tabıǵattyń aıasynda ashylady. Bódene aýylynda turatyn sýretshi ómir boıy mektepte beıneleý jáne syzý páninen sabaq berdi. О́leń de jazady. Bes kitaby jaryq kóripti. Kez kelgen sýretshiniń alǵashqy armany – jeke sheberhana bolsa kerek. Tilek Halın de únemi úıinde jumys isteıtin. 2017 jyly alaqandaı aýylynan túrli janrdaǵy týyndylary qoıylǵan óz galereıasyn ashty. Sol aýyldyń irgesin, sol aspan, sol meken, sol adamdar, sol dalany beınelegen avtor bar shyǵarmashylyǵyn týǵan topyraǵynda pash etip jatqanynyń ózi kóńil tebirentedi. О́zi de bir suhbatynda talanttyń qaınar bulaq kózi tabıǵattan bastaý alatynyn aıtady.
«Shyny kerek, kóp adam aýyldyń mádenıetin qalaǵa qaraǵanda tómendeý sanaıdy. Aýyldy damymaǵan, órkenıetten tys qalǵan «aral» kóredi. Shyn máninde, rýhanı kúshtiń bári aýylda jatyr. «Uly dala» degen tirkes teginnen aıtylǵan sóz emes. Aýyl – rýhanııattyń ózegi. Biraq uly dalanyń osynaý rýhyn kez kelgen adam sezine bermeıdi. Sýret áleminiń ózinde birneshe tús qoldanylyp, birneshe janrdy biriktirgen kartınalar beınelenip jatady ǵoı. Sol sııaqty ómir syzylyp qoıǵan shemaǵa syımaýy kerek. Sonyń ishinde sýretshiler tabıǵattan, uly daladan jylýlyq, shabyt alý arqyly, ózin damytady dep oılaımyn», deıdi Tilek Halın.
Iá, bul sheberhana búginde Bódenege joly túskenderdiń mádenı aıaldamasyna aınalyp otyr.
Jetpisten assa da sheberhanasynan shyqpaıtyn sýretshiniń jeke qorynda 100-den astam kartına bar. Avtor týyndylary Túrkııa, Italııa, Germanııa sekildi shetelderge tanymal. Al ózi kezinde Máskeýde ótken búkilodaqtyq shyǵarmashylyq konkýrstyń laýreaty atanǵan.
Tabıǵattyń túrli tylsym kúıin beınelegen avtor kenepte tarıhı taqyrypqa da jol saldy. Mahambet batyr, Aısha bıbige arnalǵan shyǵarmalarynan erekshe bir ulttyq saryn esip turady. Qazaqtyń darqan dalasynyń ǵalamat kúshi ár boıaýdyń túsimen úndese kelip, rýhtana túsetindeı.
Osy qatardaǵy «Han qyzynyń serýeni» dep atalatyn týyndysy Saraıshyq jerindegi mýzeıde saqtalǵan. Aýyl sýretshisiniń tarıhı taqyryptaǵy birneshe kartınasy búginde álemniń ár túkpirinde ilinip tur. Máselen, onyń ishinde «Abylaıhan týraly ańyz» atty alyp kartınasy da bar.
Shyǵarmashyl adamnyń týǵan jerin, týǵan halqyn, týǵan topyraǵy darytqan ónerin qulaı súıýi qylqalamyna áser etpeı qoımasy anyq. Bul sózimizdiń dál mysaly – Tilek Halınniń tutas galereıasy. Ultyna da, ónerine de adal sýretshi talanty arqyly qazaqtyń atyn shyǵarǵysy keledi. Kenepte de óz aınalasyn, óz qoǵamyn, óz aýylyn, óz tabıǵatyn, óz bolmysyn, óz tarıhyn sýrettedi. Ataǵy aspanǵa ushqan ańyz-tulǵalarǵa eliktegen joq, túrli jańa modernıstik baǵyttarǵa burylǵan joq. О́z qoltańbasyn óz boıynan, óz aınalasynan taýyp, sheberligin shyńdaı tústi. Tabıǵattan, dala úninen qýat aldy. Sýretshiniń osy kúnge deıin týǵan topyraǵynan kindik úzbeı otyrǵany sodan bolar, sirá.
