Bilikti, bilimdi maman tabý úshin jumys usynýshylardyń qatarynda maman tapshylyǵyn kórip otyrǵan aýdandar men qalalardaǵy ár sala ókilderi kelip qatysty. Odan bólek «ÚMZ» AQ, «Birikken energetıkalyq kompanııa» AQ, «Vostoksvetmet» JShS, «О́skemen qus fabrıkasy» AQ syndy alpaýyt kompanııalar men shaǵyn kásiporyn ıeleri de jaýapty ári saýatty maman izdep keldi.
– «Shyǵys mamany» bos jumys oryndar jármeńkesiniń maqsaty – jumys berýshiler men jumys izdeýshi mamandardy, jastardy bir-birimen tikeleı baılanystyryp, jumyssyzdardyń qataryn azaıtý edi. Shyǵys Qazaqstan oblysy boıynsha 100-den astam jumys berýshi 1 500-den astam bos jumys ornyn usynyp otyr. О́ńirimizde túrli ónerkásip salalarynda, taý-ken óndirisinde, bilim jáne medısına mamandarynyń tapshylyǵy bar ekeni anyqtalyp otyr, – deıdi oblystyq jumyspen qamtý jáne áleýmettik baǵdarlamalardy úılestirý basqarmasy basshysynyń orynbasary Dınara Qojanova.
Maman izdeýshilerdiń qatarynda memlekettik basqarý júıesiniń uıymdary, qarjy salasy, quqyq qorǵaý organdary, bilim berý, densaýlyq saqtaý, mádenıet mekemeleriniń ókilderi de bar. Aıta ketsek, orman sharýashylyǵy salasynda da maman tapshylyǵy bar.
– Biz bos jumys oryndar jármeńkesine bıyl úshinshi ret qatysyp otyrmyz. Qazirgi tańda Prezıdent tapsyrmasymen Ulttyq ulanǵa qabyldanatyn áskerı qyzmetshilerdiń qatary arta tústi. Osyǵan baılanysty bizde jańa laýazymdar ashylyp jatyr. Sondyqtan bos turǵan laýazymdarǵa maman izdeý úshin búgingi jármeńkege qatysyp otyrmyz. Bizge jumysqa kirgen áskerı qyzmetshilerdiń ofıser shenine deıin kóterilip, áskerı oqý oryndarynda bilim alýyna múmkindigi bar. Odan bólek, áskerı qyzmetshilerge kórsetiler áleýmettik kómektiń de túri kóp, – deıdi 3477 ulttyq ulan áskerı bólimi komandıriniń tárbıe jáne áleýmettik-quqyqtyq jumystar jónindegi orynbasary, maıor Ańsar Shákenov.
Jármeńkege qatysýshylarǵa jańadan qurylǵan Marqakól aýdanynan kelgen ókilder kóptegen bos jumys ornyn usynsa, Glýbokoe aýdanynyń bilim bólimi 99 birlik bos jumys ornyn usynyp otyrǵanyn jetkizdi. Sonymen qatar oblysqa qarasty barlyq aýdandardyń ókilderi de ózderindegi bos jumys oryndary baryn aıtyp, jumys izdeýshilerge aqyl-keńes berip, baılanys nómirlerin almasty.
– Tárbıe jumysyn uıymdastyrý mamandyǵy boıynsha oqý ornyn bitirip jatyrmyn. Búgingi bos jumys oryndary jármeńkesine jumys izdep keldim. Eger ózime qolaıly jumys tabylsa, isteýge daıynmyn. Ázirge birneshe jumys berýshimen sóılestim. Taǵy da basqa jumys usynýshylarmen sóılese kele tańdaý jasaımyn, – deıdi kolledj túlegi Karına Muratqyzy.
Aıta keterligi, ashyq platformada jumys berýshiler óz kompanııalarymen tanystyryp, kerekti maman ıeleri boıynsha kandıdattardyń jeke bazasyn qalyptastyrýdy oıǵa alǵan. Ondaǵy maqsat – oblysymyzdaǵy maman tapshylyǵyn rettep, jumyssyzdar qataryn azaıtý kózdelgen.
Sóıtip, О́skemende birinshi ret Jumyspen qamtý jáne áleýmettik baǵdarlamalardy úılestirý basqarmasy, eńbek mobıldiligi ortalyǵy, qalalar men aýdandardyń mansap ortalyqtary, jergilikti atqarýshy organdarymen, jumys berýshilermen birlese otyryp jumys izdep júrgen adamdar, jastar, joǵary oqý oryndary, kolledj túlekteri úshin «Shyǵys mamany» jumys usyný oblystyq platforma uıymdastyryp, ótkizdi.
Is-sharanyń negizgi maqsaty jumys berýshimen tikeleı baılanys platformasyn qurý arqyly jumyssyz azamattardy, bilim berý uıymdarynyń túlekterin jáne jastardy jumysqa ornalastyrýǵa járdemdesý edi.
Shyǵys Qazaqstan oblysy
