– Mańyzdy emes máselelermen basymyzdy aýyrtamyz da júremiz. Sanamyzǵa salmaq, júregimizge júk artyp alamyz. Al eń ókinishtisi – alysqa kóz tikpeı, aıaǵymyzdyń astyn ǵana kóretinimiz. Esterińizde me, bizge bala kezimizden «Kózińe qarap júr... Baıqa, qulap qalma» degen sózderdi qulaǵymyzǵa quıyp keldi.
Sonyń qyrsyǵynan dúnıeniń dıdaryna janarymyzdy sýara almaǵan kúıde eshteńe túsine almaı ómirden ótip ketemiz. Biraq tirshilik tizbeginde tirnektep júrip kóńil kúmbezinde «Joǵaryǵa! Úıge qaraı!» degen daýys kúńgirlep turady. Bálkim bul – kelgen jaǵymyzǵa qaraı, ilki otanymyzǵa degen saǵynyshtan týǵan umtylys shyǵar...
Al sol jaqqa jónep ketken jandardy qaıda qoıasyz? Týra biz sııaqty ǵoı olar da. Biraq olar qazir óz úıinde jáne óte baqytty. Keıde maǵan olar biz týraly oılaıtyn sekildi bolady.
Iá, olar bizdi aıaıdy, saǵynady. Al sizder sezbeısizder me muny? Eske túsirińizshi, sizdi bireý kútip júrgen sııaqty sezim bolǵan shyǵar áıteýir?
...Osy ǵashyqtar nege juldyz sanaıdy? Nege olarǵa aspan sondaı ásem kórinedi? Bálkim kók qaqpasy ashylyp, burynnan biletin álimsaqtaǵy álemi ózine shaqyratyn shyǵar?
Qyzyq, bala kezde nelikten qalyqtap, ushyp júrgen túster kóremiz? Al qarttyqqa aıaq basqanda tómenge quldılap bara jatqandaı kúı keshemiz. Bul sondaı aýyr sezim! Biraq siz mundaı tústi áli kórip úlgermegen shyǵarsyz...
Nelikten biz túsimizde ózimizge múlde beımaǵlum tilderde erkin sóılese beremiz? Bolmasa óńimizde kórmegen óńirler men túısigimizge túnemegen tóńirekte serýendep júremiz. Sol ýaqyttaǵy sheksizdikke bergisiz sátterdi aıtsańyzshy. Sondaı jarqyn, sondaı ystyq. О́kinishtisi, solardyń kóbi tań ata umytylyp qalady.
Al men buryn-sońdy kórmegen beıtanys adamdy burynnan tanıtyndaı sezim keshkenińizge senimdimin. Quddy et jaqyn ejelgi dosyńdy áreketinen, ıisinen tanyǵandaı, ıá?
Al eshkimniń aýzynan shyqpasa da, bizge baǵyttalǵan qaratpa sózderdi qaıda qoıarsyz?! Ondaǵan, joq júzdegen daýys bizdi kómekke shaqyrady, qaýipti aldyn ala eskertip jatady. Biraq qaıdan?
Bul – bizdiń júregimizde bar qasıet. Eger bulardyń barlyǵy bolmaǵanda... Onda osynshalyq qysqa, bir sáttik ǵumyrdy súrýdiń qandaı máni qalady? Biraq osyndaı qas qaǵym ýaqytta basqa da kóp adam úshin myń ólip, myń tirilip jatamyz... Bul ne nárse ózi? Aıtyńyzdarshy?
Menińshe, bul – dúnıedegi eń qymbat áserler. Al olardy ne úshin óltirip jatyrmyz biz? Onyń da bir maqsaty bar emes pe ishimizde? Aınalańyzǵa qarańyzshy. Adamdar bul názik syrdy uǵynǵan bolsa, barlyǵy bútinniń bólshegi ekenin túsinip, qazirgideı bir-birin renjitip, azapqa salmas edi ǵoı...
Shirkin, ómirdiń qamshynyń sabyndaı qysqa ekenin, onyń mánin tabýǵa tyrysý kerektigin, barlyq qıynshylyqtyń ýaqytsha bolatynyn jan-dilimen uqqanda ǵoı...
Kúnderdiń kúninde bizdiń balalarymyz, bolmasa nemerelerimiz uǵady muny. Olar usaq-túıektiń bárin ysyryp tastap, bir-birin shynaıy súıedi. Al ózderiniń urpaqtaryna: «Aıaǵyńnyń astyna qaraı berme, basyńdy kóter» dep aıtatyn bolady.
