Eń taza aýyl

Baıqaýǵa Ulan aýda­nyn­daǵy barlyq 16 aýyl­dyq okrýg jáne 45 eldi meken qatysyp, ózderiniń bereke-birlikterin kórsetti. Tazalyqqa úndeıtin baıqaý qorytyndysy boıynsha aýdandaǵy eń úzdik «Taza aýyl» dep Januzaq aýyly tań­dalyp, júldeli 10 mln teńge kó­leminde sertıfıkatqa ıe boldy.

– Aýdanymyzdaǵy bel­sen­diler men qorshaǵan ortaǵa beıjaı qaraı almaıtyn azamattar osy atalǵan baıqaýǵa jemisti jumys atqarǵandaryn maqtanyshpen aıta alamyz. Aýylymyzdyń kór­keıýi men taza bolýy osyndaı jan­dardyń tynymsyz eńbeginiń arqasy. «Taza Qazaqstan» aksııasy aıasynda aýdanymyzda aıtýly sharalar iske asty. Atap aıtsaq, kıeli meken Aqbaýyr arheologııalyq kesheni tolyǵymen tazalanyp, Asýbulaq orman sharýashylyǵynda 22 myń kóshet otyrǵyzyldy. Sondaı-aq Sibe, Dubyǵaly jáne Shybyndy kól jaǵalaýlary qoqystan tazartylyp, Tavrııa aýyldyq okrý­ginde «Taza beısenbi» senbiligi ótti. Týǵan jerdi jasyl jelekke aı­nal­dyrý baǵytynda qyzmet etetin osyndaı janashyr jáne belsendi azamattar qatary arta bersin, – deıdi Ulan aýdanynyń ákimi Dýman Esdaý­letuly.

Esterińizge sala keteıik, baı­qaýda komıssııa músheleri aryqtar men kanaldardy ta­zalaýǵa, abat­­tandyrýǵa basa nazar aýdardy. Ár aýyldan júzdegen adamdar j­u­myldyrylyp kóshe­ler tazalandy, abattandyrý jumystary júrgizildi jáne jasyl jelek otyr­ǵyzyldy. Sonyń ishinde eń­bektegen baladan, eńkeıgen qartqa deıin Januzaq aýylynyń turǵyndary bereke-birlik tanytyp, bir adamdaı senbilikke belsene atsalysty. «Aýylyna qarap, azamattaryn tany» demekshi, bul aýyl buǵan deıin ishimdikten bas tartqan aýyl retinde bilsek, endi mine, Ulan aýdanynyń eń úzdik «Taza aýyly» atandy. Berilgen 10 mln teńge qarjyny aýyl tur­ǵyndary ózderi aqyldasa otyryp, aýyldaryna qajetti dúnıe salýǵa jumsamaq.

– «Taza aýyl» baıqaýy – aýdan turǵyndaryn tazalyqqa sha­qyratyn, týǵan ólkeni jasyl jelekke aınaldyrýǵa úles qo­satyn áleýmettik mańyzy bar joba. Sońǵy jyldary aýyldar­da abat­tandyrylǵan aýlalar kó­beıgen. Bul jyl saıyn ótki­zilip kele jatqan osyndaı sha­ralardyń nátıjesi. Mundaı baı­qaýlar aýyldyń sanıtarlyq tazalyǵyn jaqsartýǵa septigin tıgizedi. Son­daı-aq Ulan aýdany «Taza Qazaqstan» ekologııalyq aksııasy qorytyndysy boıynsha Shyǵys Qazaqstan oblysynda kósh bastap tur – deıdi Jastar resýrstyq orta­lyǵynyń basshysy Serik As­qabylov.

Shyǵys Qazaqstan oblysy,

Ulan aýdany