Foto: Aqorda
«О́zderińizge málim, qazir elimiz damýdyń jańa satysyna qadam basty. Biz sońǵy 5 jyldyń ishinde aýqymdy saıası reformalardy júzege asyrdyq. Qazaqstannyń saıası júıesi túbegeıli ózgerdi. Parlamenttiń yqpaly, Úkimettiń jaýapkershiligi aıtarlyqtaı artty. Bılik tarmaqtary arasyndaǵy tepe-teńdik ornyǵa tústi. Saıası partııalardyń qoǵamdyq róli kúsheıdi. Azamattarymyz óz oı-pikirlerin ashyq aıtyp, qoǵamda belsendi bolýyna múmkindik beretin naqty tetikter paıda boldy. Saılaý júıesin jetildirdik. Aýyl, aýdan ákimderi tikeleı saılana bastady. Saıası jáne qoǵamdyq mádenıet úlken ózgeriske ushyrady», dedi Memleket basshysy.
Sondaı-aq Memleket basshysy eń mańyzdy bastamanyń biri – Prezıdent jeti jyldyq merzimge bir ret qana saılanatynyn, osy sheshimniń saıası mán-maǵynasy erekshe ekenin, bul – memleket basqarý isinde jańa standart qalyptastyratyn mańyzdy qadam ekenin atap ótti.
«Reformalar, ózgerister áli de jalǵasa beredi. Eń bastysy, bul ózgerister – halyqtyń tańdaýy. Sondyqtan biz eshqashan keri qaıtpaımyz, tek alǵa qaraı júremiz. Biz ekonomıkalyq damýdyń naqty baǵytyn aıqyndadyq. Ozyq el bolý úshin aýqymdy jumysty qolǵa aldyq. Sizder tyń bastamalardy jurtshylyqqa jan-jaqty túsindirýge zor úles qostyńyzdar. Shyn máninde, barlyq reformany ózderińizben birge atqardyq deýge bolady. Biraq ózgeristerdi júzege asyrý bir basqa, al ony ornyqtyrý bir bólek. Ol úshin qoǵamdyq sana túbegeıli jańǵyrýǵa tıis», dedi Qasym-Jomart Toqaev.
Memleket basshysy Ulttyq quryltaıdyń Atyraýdaǵy otyrysynda jalpyǵa ortaq qundylyqtar týraly aıtqanyn eske salyp, munyń bári ulttyń jańa sapasyn qalyptastyrý úshin aıryqsha mańyzdy ekenin atap ótti.
«Ashyǵyn aıtsaq, osy qundylyqtardy qoǵam sanasyna ornyqtyrý jýrnalısterge tikeleı baılanysty. Aqparat ókilderi bolmasa, ony jurtqa jarııa etý múmkin emes. Sondyqtan jýrnalıster qaýymy osy mańyzdy jumysqa zor jaýapkershilikpen qaraıdy dep senemin. Biz árbir sózimizdi qoǵamdy túzeýge jumsasaq, bolashaǵymyz da baıandy bolary haq. Men Quryltaı otyrysynda elimizge qater tóndiretin bes keselge toqtaldym. Taǵy da qaıtalap aıtqym keledi. Jurtty nashaqorlyq pen qumarpazdyqtan, turmystyq zorlyq-zombylyqtan, vandalızm men ysyrapshyldyqtan qorǵaý – ortaq mindet. Memleket bul baǵytta naqty qadamdar jasap jatyr», dedi Memleket basshysy.
