Memleket basshysy daýys berý rásimine qatysty

ASTANA. 26 sáýir. Memleket basshysy Nursultan Ábishuly Nazarbaev Astanadaǵy Oqýshylar saraıynda ornalasqan № 81-shi saılaý ýchaskesinde daýys berdi. Bul týraly egemen.kz tilshisi habarlady. «Búginde elimizde tarıhı mańyzdy oqıǵa – jalpyulttyq Prezıdent saılaýy ótýde. Otandyq jáne shet memleketterdegi saılaý ýchaskelerin alatyn bolsaq, olardyń sany 9700-den asady jáne 9,5 mln-ǵa jýyq adam daýys berý quqyna ıe. Búgin bul azamattardyń árbiri óz konstıtýsııalyq quqyǵyn oryndap, óz bolashaǵyn tańdaı alady, bolashaq baǵytymyzdy aıqyndap, bılikke baǵa bere alady, – dedi N.Nazarbaev daýys berý rásiminen keıin buqaralyq aqparat quraldary ókilderine bergen suhbatynda. – Osy saılaýǵa bir kisideı atsalysqan barlyq baqylaýshyǵa, tilshiler qaýymyna, BAQ ókilderine alǵysymdy bildiremin. Bárińizge rahmet!». Esterińizge sala keteıik, daýys berý jergilikti ýaqyt boıynsha tańǵy saǵat 7.00-den 20.00-ge deıin 9741 saılaý ýchaskesinde ótedi. Onyń ishinde Qazaqstan Respýblıkasynyń shet memleketterdegi ókildikteriniń janynan ashylǵan 65 saılaý ýchaskesi bar. Qazaqstan Respýblıkasy Prezıdenti saılaýynyń aldyn ala qorytyndysy 27 sáýirde jarııalanady. Daýys berý aıaqtalǵannan keıin ýchaskelik saılaý komıssııalary 12 saǵattyń ishinde daýystardy sanaýǵa mindetti. Osydan keıin qujattar aýmaqtyq saılaý komıssııalaryna jetkizilip, árbir saılaý komıssııasy deńgeıinde daýys berýdiń aldyn ala qorytyndysy boıynsha sáıkesinshe hattama jasalady. Al 7 kúnniń ishinde saılaýdyń sońǵy qorytyndysy shyǵarylady. Láılá Ediqyzy. Derek: egemen.kz. Sýret: nur.kz.