Foto: Erlan Omar
«Dara» Prezıdenttik bastamalar qorynyń uıymdastyrýymen ótken is-sharada mass-medıa salasynyń qyzmetkerlerine páter sertıfıkattaryn Qazaqstan Respýblıkasy Prezıdentiniń keńesshisi – Baspasóz hatshysy Berik Ýálı, Mádenıet jáne aqparat mınıstri Aıda Balaeva jáne «Dara» qorynyń prezıdenti Ásel Shildebaeva saltanatty túrde tabystady.
Qazaqstan Respýblıkasy Prezıdentiniń keńesshisi – Baspasóz hatshysy Berik Ýálı Memleket basshysynyń BAQ salasyn damytýǵa aıryqsha mán beretinin aıta kelip, qýanysh ıelerin jańa qonysymen quttyqtady.
«Jýrnalıster arasynda «biz ne memlekettik qyzmetshilerdiń, ne bıýdjettik mekeme qyzmetkerleriniń sanatynda joqpyz, memlekettik baǵdarlamalardyń ıgiligin kóre almaımyz» degen másele jıi kóteriletin. Prezıdenttiń tapsyrmasymen sol olqylyqtyń orny tolyp, jyl saıyn jýrnalısterge baspana berý dástúrge aınaldy. Eń bastysy, páter kiltteri elimizdiń damýyna, Memleket basshysy júrgizip otyrǵan reformalardy halyqqa jetkizýge eleýli úles qosyp kele jatqan BAQ ókilderine tabys etiledi. Sonyń ishinde baspana shyn máninde muqtaj jandarǵa berilip otyr. Atap aıtqanda, 21 páter kópbalaly otbasyǵa, 5 páter jalǵyzbasty analarǵa berildi. Sonymen qatar otbasynda múmkindigi shekteýli balasy nemese jubaıy bar 11 azamat baspanaly boldy. Páter alǵan BAQ salasy qyzmetkerleriniń arasynda 6 januıa osy ýaqytqa deıin jatahanada turyp kelgen. Bul ıgi dástúr aldaǵy ýaqytta da jalǵasyn tabady. Bir otbasy baspanaly bolsa, qýanyp, halyqtan súıinshi suraıtyn jýrnalısterdiń úıli bolýy – óte qýanyshty jaǵdaı», dedi Berik Ýálı.
Mádenıet jáne aqparat mınıstri Aıda Balaeva memleket áleýmettik jobalardy tolyǵymen qoldaıtynyn atap ótti.
«Memleket basshysy turǵyn úı máselesine kóp kóńil bóledi. Qoljetimdi baspana boıynsha túrli áleýmettik jobalardan basqa, Qazaqstannyń bir mıllıon úsh júz myńnan astam azamaty turǵyn úı jaǵdaıyn jaqsartý úshin, jalpy úsh trıllıon teńgeden astam zeınetaqy jınaǵyn paıdalanǵanyn da atap ótken jón. Bul memlekettiń óz azamattaryna jerdem berýiniń teńdessiz tetigi», dedi mınıstr Aıda Balaeva.
Sertıfıkat ıeleriniń qatarynda «Egemen Qazaqstan» gazetiniń alty qyzmetkeri de bar. Olar: Internet-redaksııa bóliminiń jetekshisi - Dınar Kerim, Ekonomıka jáne óndiris bóliminiń meńgerýshisi - Abaı Aımaǵambet, Mádenıet jáne ádebıet bóliminiń tilshileri - Jánibek Álıman men Batyrhan Sársenhan, «Egemen Qazaqstan» gazetiniń bet qattaýshy-dızaıneri Záýresh Nuǵymanova, sondaı-aq, «Qazaq gazetteri» JShS kadrlyq qamtamasyz etý jáne kadrlyq is júrgizý mamany Baqytjamal Qaıbjanova.
Aıta keteıik, byltyr Memleket basshysynyń atynan BAQ qyzmetkerlerine 1 jáne 2 bólmeli 65 páter, al bıyl 67 páter berildi. Naqtyraq aıtqanda, 13-i – 3 bólmeli, 45-i – eki bólmeli, 9-y – bir bólmeli páterler.
