Sýretti túsirgen – avtor
Oqýshylardyń ár kúnine qurylǵan arnaıy baǵdarlama bar. Kúndelikti oqý-jattyǵýdan bólek Katonqaraǵaıdyń kıeli jerlerimen tanysady. Olardy qabyldap alǵan otbasylar aldyn ala jan-jaqty kýrstan ótip, baǵyt-baǵdar alǵan pedagogter. Jazǵy lagerge kelgen balalarǵa as-sýyn ázirlep barlyq jaǵdaıdy jasaıdy. Byltyr qanatqaqty joba retinde bastalǵan «Qonaqjaı otbasy» lageri bıyl jalǵasyn tapty. Alys aýdandardan kelgen oqýshylar Tór Altaıdyń tumsa tabıǵatyn armansyz aralap júr. Kúni keshe Berel qoryq-mýzeıinde bolyp, sonaý saqtar men túrkiler zamanynan aqparat beretin kóne jádigerlerdi kórdi. Shyńǵystaı aýlyndaǵy Oralhan Bókeıdiń mýzeıine kirip, jazýshynyń ómirbaıanymen tanysty, shyǵarmalaryna úńildi. Jolaı qymyz baptaıtyn aýyldarǵa toqtap, bıe baılaýdyń qyr-syrymen tanys boldy. Qazaqtyń naǵyz rýhanı ortasy olar úshin tańsyq edi.
– Bıyl Katonqaraǵaı aýdanynda 4 mektep muǵalimi óz úılerine orystildi balalarǵa qazaq tilin úıretý úshin qabyldap otyr. Sonyń ishinde Jambyl orta mektebiniń muǵalimderi 28 balany qabyldady. Olarǵa on otbasy qyzmet kórsetip júrmiz. Kelgen kúnnen olardy top-topqa bólip tastadyq. El-jermen tanysyp, máz. Qazaq tilin úırenýge de qulshynystary jaqsy. Kózdegen maqsatymyz, qazaq otbasynyń tárbıesin kórsetý, aýdannyń tynys-tirshiligimen tanystyrý. Sondyqtan balalardyń kúndelikti baǵdarlamasy tyǵyz. Bos ýaqyty joq. Máselen, Berel qoryq-mýzeıindegi at ábzelderin kórgen olarǵa júgen túıý syndy qolónerimizdi de kórsettik. Atpen serýendedi. Sondaı-aq bir-bir qorjyn syıladyq. Sol qorjynǵa qazaqsha sóz jazyp qoıamyz. Sony kúni boıy jattaıdy, keshkisin suraımyz. Úı sharýashylyǵyna da aralastyrdyq. Az ýaqyt ishinde bir otbasyndaı bolyp kettik, – deıdi Qonaqjaı otbasynyń jetekshisi Roza Aýǵanbaeva.
Bul jobaǵa muǵalimder bar bilimi men tájirıbesin salyp-aq jatyr. On bes kún ishinde oqýshylar qanshalyqty qazaqsha úırenedi, ýaqyt kórsetedi. Qazynadan qyrýar qarjy bólinip, jasalǵan joba bolǵandyqtan, nátıjeli bolǵany jón. Aıta keteıik, «Qonaqjaı otbasy» jobasy úshin 23 mln 940 myń teńge qarjy bólingen. Az qarajat emes. Munyń bári orystildi oqýshylardyń qazaqsha úırenýleri úshin jasalyp jatyr. Demek, oqýshy da, ata-ana da, muǵalim de jaýapkershilik tanytqandary abzal.
Ámbege arman Altaıdy aralap júrgen oqýshylar baqytty. Oıyn túrindegi baǵdarlamalardyń úıreteri mol.
– «Qonaqjaı otbasy» jobasyna kelgenime qýandym. Bizdi avtobýstan túse sala qushaq jaıyp qarsy aldy. Ár kúnimiz qyzyqty ótip jatyr. Shyǵys Qazaqstanda turyp jatqanymyzben, Katonqaraǵaıdyń tabıǵaty munshalyqty sulý ekenin bilmeppin, – deıdi Glýbokoe aýdanynan kelgen oqýshynyń biri Anna Shkoldına.
Top-topqa bólingen oqýshylar Katonqaraǵaı aýlyndaǵy «Jas týrıst» ortalyǵynda bolyp, qyzyqqa keneldi. Jarysty, saıysty. Jasandy shyńǵa órmelep, alpınızmniń ne ekenin bildi. Sóz júzinde ǵana emes, munda praktıkaǵa zor kóńil bólingen.
Birden aıtaıyq, orystildi synyptar úshin mektep baǵdarlamasynda qazaq tili bolǵanymen, oqýshylardyń qazaq tilin bilip turǵandary shamaly. Eki sózdiń basyn quraýlary muń. On bes kún ishinde saırap ketpese de turmystyq jaǵdaıda paıdalanatyn sózderi bilip shyqsa, eńbektiń jemisi der edik. Aýyldaǵy úırenýmen ǵana shektelmeı, nıet qoıyp, ári qaraı da óz betterinshe úırener me edi?
Shyǵys Qazaqstan oblysy,
Katonqaraǵaı aýdany
