foto: Valerıı Býgaev
Jańa qonys ıelerin oblys ákimi Asaıyn Baıhanov quttyqtady.
«Úıleri zardap shegip, apatty dep tanylǵan adamdardyń búgin qonys toılaryn toılap jatqanyna óte qýanyshtymyn. El Prezıdenti Qasym-Jomart Toqaevtyń tapsyrmasy boıynsha biz sizderdiń aýyldaryńyzdaǵy tótenshe jaǵdaıdyń saldaryn barynsha joıýǵa tyrystyq. Qıyn kezeńderde shydamdylyq tanytqandaryńyz úshin barshańyzǵa rahmet», dedi óńir basshysy.
Sondaı-aq oblys ákimi demeýshilik kórsetken ERG toby men «OAEK» AQ, sondaı-aq 3 aıdyń ishinde sapaly úılerdi salǵan jergilikti «Aqtoǵaı-Agro» JShS qurylys kompanııasyna alǵysyn bildirdi. Úıler jańa ári bıik jerde turǵyzyldy.
«ERG Qazaqstandaǵy 30 jyl boıy jumysynda árdaıym elmen birge boldy. О́z shańyraǵynyń bolýy kez kelgen otbasy úshin mańyzdy, sondyqtan, biz jańa baspanaǵa qonystanǵan otandastarymyzdyń qýanyshyn bóliskenimizge qýanyshtymyz. О́ıtkeni bizdiń kompanııanyń mıssııasy – bizge senim bildirgenderdiń órkendeýin qamtamasyz etý», dep atap ótti ERG dırektorlar keńesiniń múshesi Shýhrat Ibragımov.
«Barlyǵyńyzǵa úlken rahmet. Bizge dál osy jerde jańa úı salǵanyna óte qýanyshtymyn. Buryn bul jerde meniń ata-anam turǵan. Biz osynda óstik», dep aýyl turǵyny Marhabat Smataev qýanyshyn bólisti.
Kópbalaly otbasylar, «Kúmis alqa» belgileriniń ıegerleri - Smataevtar, Baımanovtar, Mýllın jáne Daıyrbekovtardyń úılerin qalpyna keltirýge múmkin bolmady.
Barlyq jańa qonys ıeleri oblystyq máslıhat depýtattarynan, sondaı-aq oblystyń úsh qalasynyń máslıhattarynan syılyq retinde turmystyq tehnıkalar (tońazytqyshtar, teledıdarlar, kir jýatyn mashınalar, as úı plıtalary, kondısıonerler jáne t.b.) aldy.
Aqtoǵaı aýdany turǵyndarynyń atynan Pavlodar oblysynyń Qurmetti azamaty, mádenıet salasynyń ardageri Beısenbi Muqajanov memleketke kórsetken kómegi úshin alǵys retinde arnaý aıtty.
«Shańyraq» MSO jáne I. Baızaqov atyndaǵy oblystyq fılarmonııa ártisteri aýyl turǵyndaryna jarqyn konserttik baǵdarlama uıymdastyrdy. Sondaı-aq sporttyq jarystar da ótkizildi.
