Batys Qazaqstan oblystyq teatry festıvaldan bas júldemen oraldy

ORAL. 11 maýsym. Batys Qazaqstan oblystyq qazaq drama teatry Qyrymda ótken halyqaralyq festıvaldiń bas júldesin jeńip aldy. Bul týraly egemen.kz tilshisi habarlady. Batys Qazaqstan oblystyq qazaq drama teatry Kerch qalasynda 5-10 maýsym aralyǵynda ótken «Bosporskıe agony» halyqaralyq antıkalyq óner festıvaliniń bas júldesin jeńip aldy. Qyrym jerinde osymen on jetinshi ret ótkizilgen óner merekesinde oraldyqtar Evrıpıdtiń «Troıa arýlarymen» kórindi. Trýppany teatr dırektory Qýanysh Amandyqov pen bas rejısseri Muqanǵalı Tomanov bastap bardy. «Troıa arýlary» tragedııasyn Oral sahnasynda tarazdyq belgili rejısser, Sh.Aıtmatov atyndaǵy halyqaralyq syılyqtyń laýreaty Qýandyq Qasymov bıyl qoıǵan bolatyn. Mine, osy qoıylym úshin batysqazaqstandyq teatr festıvaldiń bas júldesi - «Bospor Nıkasymen» marapattaldy. Sonymen qatar Gekýba rolinde oınaǵan teatr aktrısasy, Qazaqstannyń eńbek sińirgen qaıratkeri Bıbigúl Isalıeva «Eń úzdik áıel beınesi úshin» atalymymen nagradtaldy. «Qazaq teatr ónerin árdaıym joǵary baǵalaıtyn Reseıdiń halyq ártisi Aleksandr Goloborodko bastaǵan qazylar alqasy jáne festıvaldi uıymdastyrýshylar Tatıana Ýmrıhına men Elena Klımenkolarǵa rızashylyǵymyzdy bildiremiz», - dedi Q.Qasymov. Eske sala keteıik, batysqazaqstandyq teatr budan buryn da halyqaralyq, respýblıkalyq óner baıqaýlaryna qatysyp, oljamen oralyp júrgen bolatyn. Ásirese, 2012 jylǵy qazanda Qostanaı qalasynda Ilııas Omarovtyń 100 jyldyǵyna arnalǵan respýblıkalyq teatrlar festıvalinde Grıgorıı Gorınniń «Atyń óshkir Gerostratyn» (rejısseri Muqanǵalı Tomanov) qoıyp, jeti birdeı júldeni alyp qaıtqan edi. Temir Qusaıyn. Derek, sýret: Batys Qazaqstan oblystyq qazaq drama teatrynyń baspasóz qyzmeti.