AQTО́BE. 26 sáýir. Qazaqstan Respýblıkasy Prezıdentiniń kezekten tys saılaýy Aqtóbe oblysynda belsendi ótýde. Búgin 14 aýmaqtyq komıssııa jumys istep, 521 saılaý ýchaskesi esigin aıqara ashty. Bul týraly egemen.kz tilshisi habarlady.
Oblys boıynsha 448 myńnan astam saılaýshy tańdaý jasaıdy. Bul saılaýǵa alys-jaqyn shetelderden kóptegen baqylaýshylar qatysýda. О́ńirge kórshiles jatqan Reseıdiń Orynbor oblysynyń ózinen 19 baıqaýshy keldi. Biz barǵan №61 saılaý ýchaskesinde saǵat 07:30-da 50-den astam saılaýshy óz tańdaýlaryn jasap úlgergen eken.
Saılaýda alǵash daýys berýshige, sondaı-aq, eń qart saılaýshyǵa qurmet kórsetilip, syı-sııapat jasaldy. Saılaý ýchaskelerinde merekelik kóńil-kúı baıqalady. Metallýrgter mádenıet úıinde ornalasqan №32 saılaý ýchaskesine kelgenimizde adamdardyń qarasy kóp boldy. Munda kúndizgi 11:00 saǵatqa deıin tirkelgen saılaýshylardyń 52 paıyzy daýys berip úlgeripti. Bul metallýrgterdiń eńbekte ǵana emes, qoǵamdyq saıası ómirde de belsendiligin taǵy bir ańǵartty.
Jalpy, oblys boıynsha 12:00-ge deıin saılaýshylardyń 36,2 paıyzy óz tańdaýlaryn jasady.
Satybaldy Sáýirbaı.
Derek, sýret: egemen.kz.
