Petropavlda kópbeıindi qonaq úıdiń qurylysy bastaldy

PETROPAVL. 11 maýsym. Oblys ortalyǵynda halyqaralyq standarttaǵy “Hampton by Hilton” qonaqúıiniń qurylysyn bastaýǵa arnalǵan shara ótti. Oǵan oblys ákiminiń orynbasary Erlan Áýkenov qatysyp, ınvestor “Nord hotel Group” JShS-niń ıgilikti isine sáttilik tiledi. Bul týraly ákimdiktiń baspasóz qyzmeti habarlady. Atalmysh nysannyń quryltaıshysy Dmıtrıı Koshelevtiń aıtýyna qaraǵanda, qonaqúıdiń jobasy arnaıy tapsyrys boıynsha Máskeýde jasalǵan. Jobanyń quny 300 mıllıon reseı rýblin, jalpy aýmaǵy 10900 sharshy metrdi quraıdy. Qurylysqa “Nord hotel Group” JShS-niń jeke ınvestısııasy jumsalady. Sonymen birge bank nesıesiniń syıaqysyn demeýqarjylandyrýǵa jáne ınfraqurylymdar tartýǵa “Bıznestiń jol kartasy - 2020” baǵdarlamasy men “Damý” qory arqyly memlekettik qoldaý kórsetý josparlanǵan. Bas merdiger – “Ýdarnık SK” JShS. Jeti qabattan turatyn 4 juldyzdy kópbeıindi qonaqúı kesheniniń joǵarǵy 5 qabatynda 120 nómir ornalasady, onyń 2-ýi – prezıdenttik, 2-ýi – lıýks, 10-y – delıýks, 106-sy – standartty nómirler. Zamanaýı ǵımaratta konferensııa zaly, fıtnes ortalyǵy jáne meıramhana ornalasady, al tómengi eki qabat saýda býtıkteri men sýpermarketterge arnalady. Oblysta teńdesi joq qurylysty 2016 jyly maýsym aıynda Qyzyljar óńirinde Qazaqstan jáne Reseı Prezıdentteriniń qatysýymen ótetin aımaqaralyq forým qarsańynda aıaqtaý kózdelip otyr. «Halyqaralyq talaptarǵa jaýap beretin alǵashqy kópbeıindi qonaqúı kesheni óńirde iskerlik týrızmdi damytýǵa, qonaqtardy joǵary deńgeıde qabyldaýǵa múmkindik beredi. Investor men bas merdiger qurylysty ýaqytyly iske qosýǵa  berýge ýáde etip otyr», deı kelip,  oblys ákiminiń orynbasary Erlan Áýkenov jergilikti qurylys materıaldaryn barynsha paıdalanýdy  atap kórsetti. «Men Petropavl qalasynyń týmasymyn. Osynda turamyn. О́z jerimniń patrıoty retinde oblys ortalyǵynda basqalarǵa uqsamaıtyn biregeı nysan salýdy oılastyryp júrgenmin. Ol úshin barlyq múmkinshilikti paıdalanamyz, dedi ınvestor Dmıtrıı Koshelev. Saltanatty rásimnen keıin “Hampton by Hilton” qonaqúıiniń qurylysyna arnalǵan kapsýla tasqa burǵylanǵan oıyqqa ornatyldy. О́mir Esqalı. Derek: Soltústik Qazaqstan oblystyq ákimdiginiń baspasóz qyzmeti. Sýret: egemen.kz