Týrızmdi damytýshylar marapaty

Qazaq jeriniń ár óńirinde otandas­tarymyz ǵana emes, sheteldikterdi de qyzyqtyratyn týrızmniń tańdaýly oryndary jeterlik. Sondaı tarıhı hám arheologııalyq orynnyń biri – Saraıshyq qalashyǵy. Onyń tarıhy shym-shymdap elge tarala bastaǵanyna on bes jyldyń júzi aýdy. Osy kezeń ishinde «Han ordaly Saraıshyq» tarıhı-memorıaldyq keshenin basqaryp, qyzyǵýshylyq tanytqan jandarǵa arǵy tarıhtan kósilte syr shertetin shejireshi Moldash Berdimuratov jaqynda Investısııalar jáne damý mınıstrliginiń «Týrızm salasyna sińirgen eńbegi úshin» tósbelgisimen marapattaldy. Sondaı-aq, oblystyq kásipkerlik jáne ındýstrııalyq-ınnovasııalyq damý basqarmasy týrızm bóliminiń basshysy Qarlyǵash Bekbaeva men oblystyq tarıhı-ólketaný murajaıy ekskýrsııa bóliminiń meńgerýshisi Oksana Áljanova atalǵan mınıstrliktiń Qurmet gramotasyn ıelendi. Bul marapattardy munaıly Atyraýdyń tarıhy men tabı­ǵatyn, týrızm salasyndaǵy tar­tymdylyǵyn keńinen nası­hattap, týrıster yntasyn oıatýǵa eleýli úlesin qosqandarǵa oblys ákiminiń birinshi orynbasary Ǵumar Dúısembaev tabystady. «Saraıshyqtyń el tarıhynda alar orny erekshe. Sol sebepten bıyl Saraıshyq týraly kıno túsiriledi. Qasym hannyń dáýirinde qazaq handyǵynyń astanasy bolǵan, uzyndyǵy – 10, eni 8 shaqyrymǵa sozylǵan, aıyna 700-ge jýyq kerýen toqtaǵan qala sol kezde týrıstik ortalyqqa aınalǵan. Sol tarıhı qala – Saraıshyq qazirde de týrızmniń ortalyǵy bola alady. Bul úshin aldymen Jaıyq ózeniniń jaǵasyn bekitip, qazba jumystaryn jalǵastyrý qajet», deıdi «Han ordaly Saraıshyq» tarıhı-memorıaldyq kesheniniń dırektory Moldash Berdimuratov. Joldasbek ShО́PEǴUL, «Egemen Qazaqstan». Atyraý oblysy.