Qazaq ýnıversıtetiniń álemdik mereıi

Ál-Farabı atyndaǵy QazUÝ Álem ýnıversıtetteri konsorsıýmyna (World University Consortium) múshe boldy. Ál-Farabı atyndaǵy Qazaq ulttyq ýnıversıteti Álem ýnıversıtetteri konsorsıýmynyń (WUC) tolyq­qandy múshesine aınaldy. Elimizdiń bilim berý salasynyń moıyndalǵan kóshbasshysy óziniń joǵary bedeli men halyqaralyq talaptarǵa saı dárejesin taǵy bir dáleldedi. Álem ýnıversıtetteri konsorsıýmy ǵalamnyń jetekshi JOO-lary men ǵylym men bilim berý salasyndaǵy halyqaralyq uıymdardy biriktiredi. Onyń mindeti adamzattyń mańyzdy máselelerin sheshýdegi ýnıversıtetterdiń rólin arttyrý, qoljetimdi jáne sapaly bilimdi jan-jaqty qoldaý, bilim berý júıelerin jetildirý bolyp tabylady. Ásirese, stýdentter áleýetin arttyrýǵa, olardyń teorııadan alǵan bilimderin is júzinde qoldanýyna erekshe kóńil bólinedi. Aıta keterligi, ár memleketten tek bir ǵana ýnıversıtet osy konsorsıýmǵa múshe bola alady. Ál-Farabı atyndaǵy QazUÝ – jahandyq halyq­ara­lyq bilim berý qaýymdastyǵyna múshe bolý már­te­besine ıe bolǵan Ortalyq Azııadaǵy alǵashqy jáne jal­ǵyz ýnıversıtet. Sońǵy jyldary JOO jetekshi reıtıngterinde qarqynmen alǵa jyljýda, halyqaralyq yntymaqtastyqty keńeıte otyryp, álemdik deńgeıdegi forýmdar men konferensııalar ótkizýde. WUC múshesi bola otyryp QazUÝ endi álemniń ataqty JOO-larynyń ǵana emes, Búkilálemdik óner jáne ǵylym aka­­demııasy, Halyqaralyq Jasyl Krest, Halyqaralyq ýnı­­versıtet prezıdentteriniń qaýym­dastyǵy, Mádenı dıp­lomatııa ınstıtýty, Alek­sandrııa kitaphanasy jáne bas­qa da bedeldi uıym­dardyń áriptesi bolyp tabylady. Bul álemde Qazaq­stannyń joǵary bilim berý júıesiniń ımıd­ji men básekege qabilettiligin kóterýge sózsiz yqpal etedi. Qorǵanbek AMANJOL, «Egemen Qazaqstan». ALMATY.