Oralda tártip saqshylary áıeldi zorlyqtan qutqaryp qaldy

ORAL. 11 maýsym. Batys Qazaqstan oblysynyń ortalyǵy – Oral qalasynda Ulttyq ulannyń sarbazdary áıeldi zorlyqtan qutqaryp qaldy. Bul týraly egemen.kz tilshisi habarlady. Oqıǵa 7 maýsymda keshki mezgilde bolǵan. Efreıtor Jandar Tasbolatov pen qatardaǵy Dáýlet Sultan jáne Nursultan Mızamovtar qyzmet barysynda №720 baǵyt boıynsha Sıolkovskıı kóshesinde qoǵamdyq tártip pen qaýipsizdikti qadaǵalap júredi. Kenet patrýldik top kómek surap aıqaılaǵan áıel adamnyń daýsyn estıdi. Dereý daýys shyqqan jerge jetken tártip saqshylary birneshe erkektiń bir áıeldi zorlamaq bolyp, kúsh qoldanyp jatqandarynyń ústinen túsedi. Shıraqtyq tanytqan sarbazdar áıeldi aram oılylardyń qolynan qutqaryp qaldy. Tergeý barysynda zorlamaq bolǵandardyń mas ekeni anyqtaldy. Ustalǵandar Oral qalalyq ishki ister bólimine jetkizildi. Al óz kásipterinde qyraǵylyq pen sheberlik tanytqan patrýldik top basshylyq tarapynan marapatqa ıe  boldy. Temir Qusaıyn. Derek: egemen.kz. Sýret: zhaikpress.kz.