Foto: akorda.kz
Prezıdentke qazirgi ýaqytta boljamdy ómir súrý uzaqtyǵynyń kórsetkishi 75 jastan asatyny jóninde aıtyldy. Jyl basynan beri ınfeksııalyq aýrýlardyń 21 túri boıynsha, sonyń ishinde koronavırýspen syrqattaný kórsetkishteri tómendegen. Vaksınasııalaý jáne profılaktıkalyq is-sharalardy júrgizý jumystary jalǵasyp jatyr.
Aqmaral Álnazarova mınıstrliktiń jumysyna qatysty Prezıdent tapsyrmalarynyń oryndalýy jóninde esep berdi. Onyń aıtýynsha, medısınalyq qyzmettiń sapasyn jáne qoljetimdiligin arttyrýǵa basa nazar aýdarylyp otyr. Alǵashqy jáne stasıonarlyq medısınalyq kómekti uıymdastyrýdyń tásilderi qaıta qaralyp jatyr. Sondaı-aq dıagnostıkalyq jáne emdeý standarttary jańartylyp, salanyń kadrlyq áleýeti nyǵaıyp keledi.
Mınıstrdiń aıtýynsha, dári-dármek pen medısınalyq buıymdardy satyp alý júıesiniń tıimdiligi men ashyqtyǵy qamtamasyz etilýde. Budan bólek, medısınalyq mekemeler jumysynyń tıimdiligin arttyryp, mindetti áleýmettik medısınalyq saqtandyrýǵa baqylaýdy jaqsartý úshin zamanaýı sıfrlyq tehnologııalar ázirlengen. Olar qoldanysqa engizilip jatyr.
Prezıdentke jańa medısınalyq nysandar salý jáne sala qyzmetteriniń sapasyn odan ári arttyrý máseleleri qamtylǵan Densaýlyq saqtaý ınfraqurylymyn damytýdyń 2025-2030 jyldarǵa arnalǵan strategııalyq jospary týraly aqparat berildi. Qabyldanǵan osy tujyrymdama aıasynda densaýlyq saqtaý uıymdarynyń ońtaıly jáne tıimdi jelisin qurýǵa baǵyttalǵan 34 negizgi jobany iske asyrý josparlanyp otyr.
Kezdesý sońynda Memleket basshysy ana men bala óliminiń kórsetkishterin tómendetý boıynsha jumysty jalǵastyrý qajet ekenin atap ótti. Sonymen qatar medısınalyq kómek kórsetýdiń meıilinshe nátıjeli bolýyna nazar aýdara otyryp, densaýlyq saqtaý júıesin sapaly túrde qaıta qurý kerektigine toqtaldy. Sondaı-aq salaǵa, onyń ishinde dári-dármekke bólinetin qarajattyń ashyqtyǵy men tıimdiligin qamtamasyz etý jóninde mindetter júktedi.
