О́SKEMEN. 26 sáýir. Shyǵys Qazaqstanda Prezıdent saılaýy erekshe ótýde. Máselen, О́skemen qalasyndaǵy №23 saılaý ýchaskesinde merekelik shara uıymdastyryldy. Bul týraly egemen.kz tilshisi habarlady.
Atalǵan saılaý ýchaskesiniń tóraǵasy Nurlan Baıjigitulynyń uıytqy bolýymen saılaý ýchaskesi aýmaǵyna qazaqtyń kıiz úıi tigilip, daýys berýge kelgen adamdar tegin tamaqtandyryldy. Qalanyń tanymal ónerpazdarynyń qatysýymen merekelik konsert jurt nazaryna usynyldy. Sondaı-aq balalarǵa arnalǵan batýt qoıylyp, onda ata-analarymen erip kelgen balalar asyr salyp oınady.
Balalardyń kóńilin kóterý úshin kloýn men mınondar shaqyrylǵan eken. Balalarǵa jeke merekelik baǵdarlama qarastyrylǵan saılaý ýchaskesinde eresekter de eskerilgen. Iаǵnı, turǵyndar daýys bergen soń utys kýpondaryna ıe boldy. Utysqa teledıdar, shańsorǵysh, qysqa tolqyndy pesh, uıaly telefon, planshet syndy baǵaly turmystyq buıymdar oınatyldy. «Men erteńgilik osy ýchaskege kelip daýys berdim. Sol kezde osy utys kýponyn alǵan bolatynmyn. Biraq, Prezıdent saılaýyna kelip, teledıdar utyp alamyn degen oı múlde bolǵan joq», – deıdi bas júldeni utyp alǵan qala turǵyny Gúlshat Kúdedaeva.
Kıiz úı tigilgen saılaý ýchaskesine jınalǵan jurt daýys bergen soń konsertti tamashalady. «Saılaýǵa oraı ótkizilgen mundaı tamasha merekeni birinshi ret kórip turmyn», – dedi qala turǵyny Ásem Toıymbaeva tańdanysyn jasyra almaı.
Dýman Anash.
Derek, sýret: egemen.kz
