Keshe Premer-Mınıstrdiń birinshi orynbasary Baqytjan Saǵyntaev Ulttyq qordan bólingen qarjylardy ıgerý máselesi boıynsha keńes ótkizdi, dep habarlady Premer-Mınıstrdiń baspasóz qyzmeti.
Memleket basshysynyń tapsyrmasy boıynsha, Qazaqstannyń Damý banki (QDB) men «Damý» kásipkerlikti damytý qoryna Ulttyq qordan óńdeý ónerkásibi salasynda jumys isteıtin kásipkerlik sýbektilerine qoldaý kórsetý úshin qarjy bólindi. QDB jelisi boıynsha ınvestısııalyq jobalardy uzaq merzimdi jeńildikti nesıeleý kelesi sharttarda júzege asyrylady: nomınaldy syıaqy stavkasy – jyldyq 6 paıyzdan artyq emes, nesıeleý merzimi – 10 jylǵa deıin, negizgi boryshty óteý boıynsha jeńildikti merzim – 24 aı, bir zaemshyny qarjylandyrý shegi – 200 mln. teńgeden 5 mlrd. teńgege deıin. 2014 jyldyń jeltoqsanynda QDB 50 mlrd. teńge mólsherinde birinshi transhty bóldi, ústimizdegi jyldyń naýryzynda bank taǵy da 50 mlrd. teńge aldy. 4 maýsymǵa qarasty jalpy somasy 46 mlrd. 442,3 mln. teńge bolatyn iri kásipkerlik sýbektileriniń 39 jobasyna qoldaý kórsetildi. Shaǵyn jáne orta kásipkerlik sýbektileri «Damý» qory arqyly kelesi sharttar boıynsha jeńildikti nesıeleýge ıe bolady: nomınaldy syıaqy stavkasy – jyldyq 6 paıyzdan artyq emes, nesıelik jeli boıynsha qoljetimdilik merzimi – bir jylǵa deıin, bir zaemshyǵa shekteýdiń eń joǵarǵy shegi – 1 850 mln.teńge. О́tken jyly qorǵa bólingen 50 mlrd. teńge men naýryz aıynda bólingen 50 mlrd. teńgege óńdeý ónerkásibi men qyzmet kórsetý salasyndaǵy ShOB sýbektileriniń jalpy somasy 80 750 mln. teńge bolatyn 425 jobasy qoldaý tapty. Keńes qorytyndysy boıynsha «Báıterek» ulttyq basqarýshy holdıngine, «Damý» qoryna jáne QDB-ǵa banktermen birlese otyryp, Ulttyq qor qarjylaryn ıgerý boıynsha jumystardyń belsendiligin arttyrý tapsyryldy.
