Kentaýda «Qoljetimdi baspana-2020» baǵdarlamasyn iske asyrý maqsatynda respýblıkalyq jáne oblystyq bıýdjetten bólingen 387 mln. 225 myń teńgege 5 qabatty 60 páterli turǵyn úı paıdalanýǵa berildi.
– Elimizde, qalamyzda halyqtyń áleýmettik máselelerin sheship, qolaıly turmys jaǵdaıyn jasaýda kóptegen jumystar atqarylýda. Bul baǵytta birneshe memlekettik baǵdarlamalar jumys isteýde. Solardyń biri – Elbasynyń qolǵa alýymen jasalǵan «Qoljetimdi baspana-2020» baǵdarlamasy. Atalǵan baǵdarlama aıasynda osy turǵyn úıdi turǵyzýǵa múmkindik týdy. Jaqynda Elbasy «100 naqty qadam» baǵdarlamasyn jarııalady. Onda da eldi damýdyń dańǵyl jolyna bastaıtyn negizgi baǵyttar kórsetilgen. Elimizdiń keleshegi kemel, bolashaǵy aıqyn. Máńgilik el bolý jolynda jumys jasalyp keledi. Halyqty baspanamen qamtý isin jalǵastyrýdy aldaǵy ýaqytta da josparlap otyrmyz. Qazirge kezde eki úıdiń jobalaý-smetalyq qujattaryn bitirip qoıdyq. Qarjylandyrý máselesi sheshilse, turǵyn úılerdi turǵyzýdy bastaımyz. Kezekte turǵan 1000-ǵa jýyq adamdy osylaısha baspanamen qamtý isin jalǵastyra beremiz, – dedi turǵyndardyń qýanyshyn bólisken qala ákimi Ábdibaqyt Maqulbaev. Qart Qarataýdyń eteginde otyrǵan, kezinde paıdaly qazbalarymen máshhúr bolǵan Kentaýdy Muhtar Áýezov Qarataýdyń tájine teńegen edi. Aıtsa aıtqandaı, sándi qala. Toqyraý tustarynda tozyp ketkeni bolmasa, jaıaý júrginshilerge aıaq joldardan bólek, velosıpedke arnalǵan, elektr shamdary jarqyraǵan joly bar, saıabaqtary kóp, jasyl jelekke bólengen kórkem qala Eýropanyń shaǵyn qalalaryn kózge elestetetin. Sońǵy jyldary Kentaý qaıta ajarlanyp keledi. Jıynda sóz alǵan Kentaý máslıhatynyń hatshysy Kerimjan Serikbaev pen qalalyq ardagerler keńesiniń tóraǵasy Isahan Jumabaev bul 60 páterdiń elimiz egemendik alǵannan beri Kentaýda paıdalanýǵa berilgen alǵashqy turǵyn úı ekendigin aıtqan. Jańa páter, eń aldymen, Uly Otan soǵysynyń ardagerleri men áleýmettik jaǵdaıy tómen otbasylarǵa, bıýdjettik mekeme qyzmetkerlerine berildi. Kópten beri páter tapshylyǵyn tartyp júrgen otbasylar memlekettiń qamqorlyǵyna alǵystaryn aıtýda. Jaqynda Kentaý qalasyndaǵy sport mektebinde Qazaqstanǵa eńbegi sińgen jattyqtyrýshy, Kentaý, Túrkistan qalalarynyń qurmetti azamaty, professor Jarylqasyn Ońalbekovtiń júldesine dzıýdodan oblystyq jarys ótti. Qala ákimi sport mektebin kúrdeli jóndeýden ótkizýge qarjy bólgen eken. Jarysqa arnaıy kelgen Ábdibaqyt Maqulbaev sportqa kerekti qural-jabdyqtarmen áli de qamtamasyz etiletindigin aıtty. О́tken ǵasyrdyń sekseninshi jyldarynda qalalyq sporttyń basshysy Jarylqasyn Ońalbekov bastaýymen qazaqsha kúres, sambodan respýblıkada aldyńǵy orynda júretin Kentaý quramasy osy jarysta bas júldege ıe boldy. Iаǵnı, Kentaý sportynda órleý bar. Shaǵyn qalalar osylaısha órkendep keledi.
Baqtııar TAIJAN, «Egemen Qazaqstan».
Ońtústik Qazaqstan oblysy.
