Kollajdy jasaǵan – Qonysbaı ShEJIMBAI, «EQ»
Zańsyz balyq aýlaǵan 694 adam jaýapqa tartyldy
Resmı derek boıynsha «Bekire-2024» keń aýqymdy balyq qorǵaý aksııasy barysynda 1 sáýirden 31 mamyrǵa deıin Atyraý jáne Mańǵystaý oblystary UQK ShQ departamentteriniń shekaralyq kemeleri, qaıyqtary jáne jaǵalaý bólimshelerimen balyq aýlaýdyń belgilengen rejimderi men erejelerin buzǵan 69 shaǵyn kólemdi júzý quraly alynyp, 166 adam ustaldy.
UQK Shekara qyzmeti Shekarany kúzetý departamentiniń konsýltanty Sabyr Hasanovtyń aıtýynsha, 297 shaqyrymǵa jýyq zańsyz balyq aýlaý quraldary (aý) tárkilengen. 7,5 mln teńgege jýyq ákimshilik aıyppul salynsa, al memleketke keltirilgen zalal shamamen 2,5 mlrd teńge bolǵan.
«Tabıǵatty qorǵaý organdary Kaspıı teńiziniń elimizge tıesili bóliginiń ulttyq jáne ekonomıkalyq múddelerin qorǵaý úshin birlesken qyzmetin kúndelikti qalyptasqan rejimde jalǵastyryp jatyr. Negizgi is-sharalar teńiz keńistigindegi Shekara qyzmeti barysynda júzege asyrylady. Shekara qyzmeti janýarlar dúnıesiniń ósimin molaıtý maqsatynda tıisti is-sharalar qoldanyp otyrady», deıdi S.Hasanov.
Bıyl 28 naýryzda Aýyl sharýashylyǵy mınıstrligi, Ishki ister mınıstrligi, Ulttyq qaýipsizdik komıteti birlesip Atyraý, Mańǵystaý, Batys Qazaqstan oblystarynyń bekire jáne basqa da balyq túrleriniń ýyldyryq shashý kezeńin ótkizý týraly buıryqqa qol qoıǵan edi. Qujatta tabıǵat qorǵaý jáne quqyq qorǵaý organdarynyń birlesken is-qımyl jospary bekitilgen. Osydan keıin biraz zańsyzdyqtyń beti ashylǵan. Máselen, aksııany ótkizý kezeńinde Jaıyq-Kaspıı oblysaralyq balyq sharýashylyǵy basseındik ınspeksııasynyń ınspektorlary quqyq qorǵaý, tabıǵat qorǵaý organdary, UQK Shekara qyzmetiniń mamandarymen birlesip, 945 zań buzylýyn anyqtap, jolyn kesipti. Nátıjesinde, 694 adam ákimshilik jaýapkershilikke tartylǵan.
«Sırek kezdesetin jáne quryp ketý qaýpi tóngen balyq túrlerine qatysty zańsyz áreket jasaý faktileri boıynsha 71 qylmystyq is qozǵaldy. Zań buzýshylarǵa 19,4 mln teńge aıyppul salyndy. Zańsyz aınalymnan 11 tonna 308 kg balyq, onyń ishinde 2 tonna 229,5 kg bekire tuqymdas balyqtar,
8 kg 328 gramm bekire ýyldyryǵy, 162 birlik balyq aýlaý quraldary, 44 sý kóligi tárkilendi. О́zen arnasy men teńiz akvatorııasyn kúndelikti baqylaý nátıjesinde sý aıdyndarynan jalpy uzyndyǵy 300 km-den asatyn 1 416 zańsyz balyq aýlaý quraldary alyndy», dedi AShM Balyq sharýashylyǵy komıtetiniń ókili Aıan Bahııanov.
Aksııa barysynda Atyraý oblysynyń quqyq qorǵaý jáne tabıǵat qorǵaý organdary Isataı, Jylyoı, Qurmanǵazy aýdandary, «Aqjaıyq» memlekettik tabıǵı rezervatyna qarasty krımınogendik núktelerdi anyqtapty.
Bıyl ýyldyryq shashý kezeńi bastalǵannan beri baqylaýdaǵy sý aıdyndarynda balyq sharýashylyǵy komıtetiniń oblysaralyq basseındik ınspeksııalary ákimshilik quqyq buzýshylyq týraly 848 hattama jasapty. Onyń ishinde 134 materıal ákimshilik jaýapkershilikke tartý boıynsha 383-bapqa sáıkes sotqa jiberilgen eken.
«Balyq aýlaý erejelerin óreskel buzǵan 5 azamatqa quqyq qorǵaý organdary qylmystyq is qozǵady. Buǵan qosa zań buzýshylardan memleket kirisine 2 784 tonna zańsyz aýlanǵan balyq, 286 aýlaý quraly, sondaı-aq 16 júzý quraly tárkilendi. 14 mln teńgeden asa qarajat kóleminde aıyppul salyndy. 4,1 mln teńge balyq resýrstaryna keltirilgen zalal úshin talap qoıyldy», dedi AShM ókili.
Kúsh biriktirgen kúres
Qazir memleket tarapynan qorshaǵan ortanyń lastaýy men bıoresýrstardy zańsyz alý máselesine erekshe kóńil bólip otyr. Memleket basshysy da balyq qoryn qorǵaý maqsatynda brakonerlikpen kúresti kúsheıtý týraly tapsyrmasy umytyla qoımasa kerek-ti. Osy rette IIM Ákimshilik polısııa komıtetiniń erekshe tapsyrmalary jónindegi aǵa ınspektory Álisher Jarmaǵambetov jaýapty salanyń baǵyttaǵy qyzmeti týraly aıtyp bergen edi. Aǵa ınspektordyń aıtýynsha, elimizdiń barlyq óńirinde ýyldyryq shashý kezeńin jiti baqylanyp, ártúrli aksııalar ótkizilip keledi.
«Alaıda polısııa qyzmetkerleri brakonerlikke qarsy kúrestegi jumysyn tek osyndaı aksııalar aıasynda ǵana emes, kúndelikti qyzmetinde de atqarady. Bul qatarda mınıstrlik tarapynan tabıǵatty qorǵaýǵa arnalǵan saqshylar bar. Brakonerlikti joıý maqsatynda memlekettik quzyrly organdar birlese shara qoldanyp otyr», dedi ol.
Aýyl sharýashylyǵy mınıstrligi men Ekologııa mınıstrligi qoldanystaǵy zańǵa sáıkes brakonerlikpen kúres jumysyna kúsh biriktirmek. Buǵan qosa qazir qyzmetkerlerdiń biliktiligin arttyrý maqsatynda Ishki ister mınıstrligi Bas prokýratýra janyndaǵy Quqyq qorǵaý akademııasymen birlese tabıǵatty qorǵaý polısııa qyzmetkerlerine trenıng ótkizip jatyr. Bul trenıngte balyq sharýashylyǵy qyzmetkerleri de bar. Trenıngke BUU mamandary da qatysyp, dáris oqyp, tájirıbelerin bólispek.
