foto: Qorǵanys mınıstrligi
Qorǵanys mınıstrliginiń baspasóz qyzmeti habarlaǵandaı, ońaltý ortalyǵynyń ashylý saltanatyna Býrabaı aýdanynyń ákimi Araı Sadyqov, Qorǵanys mınıstrligi basshylyǵynyń, Qarýly kúshterdiń Bas áskerı-medısınalyq basqarmasynyń ókilderi jáne Shýchınsk garnızonynyń jeke quramy qatysty.
Is-sharaǵa qatysýshylardy Qorǵanys mınıstriniń tyl jáne áskerı ınfraqurylym jónindegi orynbasary general-leıtenant Qanysh Ábýbákirov quttyqtady. Ol bul mekeme bitimgerlik mıssııalar men tótenshe jaǵdaılardyń saldaryn joıýǵa qatysqan, sondaı-aq áskerlerdiń jaýyngerlik jáne kúndelikti ómirinde erekshelengen áskerı qyzmetshiler sanatorlyq-kýrorttyq jáne qalpyna keltirý eminen ótetin alǵashqy ońaltý ortalyǵy ekenin atap ótti.
«Memleket basshysy belgilegendeı, ult densaýlyǵynyń basymdyǵyn eskere otyryp, Qorǵanys mınıstri qysqa merzimde áskerı qyzmetshilerdi emdeý-qalpyna keltirý ortalyǵyn qurý mindetin qoıdy. Búgin biz osy qýanyshty oqıǵanyń kýási bolyp otyrmyz. Kásibı daıyndalǵan mamandarmen jasaqtalǵan jáne zamanaýı jabdyqtarmen jaraqtanǵan ortalyq jyl saıyn júrek, tynys alý, júıke júıesi jáne tirek-qımyl apparaty aýrýlary bar myń jarymnan astam áskerı qyzmetshini medısınalyq ońaltýǵa múmkindik beredi», dedi mınıstrdiń orynbasary.
Bas áskerı-medısınalyq basqarmasynyń bastyǵy - medısına qyzmetiniń polkovnıgi Erjan Smaıyldyń aıtýynsha, on táýlikke sozylatyn em qabyldaýda munda bir lekpen 60 adam ońaltýdan óte alady. Pasıentter emdik dene shynyqtyrýmen aınalysyp, fıto, fızıoterapııa alady. Onyń ishinde elektr jaryǵy, magnıtoterapııa, parafınmen emdeý jáne elektroson, sýmen emdeý kesheni, emdik-profılaktıkalyq massaj, ıngalıasııa jáne aeroterapııa bar.
Jaqynda ońaltý bólimine 30 áskerı qyzmetshi kelip ornalasty. Aldaǵy aılarda ortalyq tolyq jumys qarqynyna kóshedi dep josparlanyp otyr.
