Foto: kursiv.media
Energetıka mınıstri búginde Qazaqstanda taýarlyq gazdyń ortasha quny myń tekshe metrine 33 169 teńgeni quraıtynyn eske saldy. Bul rette taýarlyq gazdyń bekitilgen kóterme baǵasy 23 646 teńgeni quraıdy.
«Gaz salasyna ınvestısııa tartý jáne taýarlyq gazdyń ózindik qunyna qol jetkizý maqsatynda turǵyndar úshin baǵanyń kúrt ósýine jol bermeýdi eskere otyryp, gaz baǵasyn kezeń-kezeńmen kóterý qajet», dedi Almasadam Sátqalıev.
Mınıstr Qazaqstan 2024 jyldyń 1 shildesinen bastap ishki naryqta taýarlyq gazdy kóterme satýdyń shekti baǵasyn ortasha eseppen 14,6 paıyzǵa ósimmen qaıta qaraǵanyn eske saldy.
«Tutastaı alǵanda, úsh jyl ishinde ishki naryqta gazdy shyǵynsyz satýǵa qol jetkizý josparlanyp otyr. Bul eldiń gazǵa degen ósip kele jatqan qajettiligin óteýge jáne elimiz úshin mańyzdy ınvestısııalyq jobalardy júzege asyrýǵa múmkindik beredi», dep qosa ketti Energetıka mınıstri.
Aıta keteıik, 1 shildeden bastap Qazaqstanda suıytylǵan munaı gazynyń baǵasy túzetilgen edi. Energetıka mınıstrligi TMD elderi boıynsha Qazaqstanda eń tómen baǵalardyń biri – 54 teńgeden 86 teńgege deıin, Reseıde bir lıtr gazdyń baǵasy - 132 teńge, Ázerbaıjanda – 171 teńge, Tájikstanda – 273 teńge ekenin atap ótti.
