Foto: gov.kz
Atalǵan oqý-jattyǵýdyń jetekshisi, Qarýly kúshterdiń Desanttyq-shabýyldaý áskerleriniń qolbasshysy general-maıor Almaz Jumakeevtiń aıtýynsha, otandyq jáne belarýstik desantshylar biryńǵaı jaýyngerlik tapsyrmany oryndaı otyryp, birikken eki bólimsheniń quramynda áreket etetin bolady.
«Jattyǵýǵa qatysýshylar bir bólmege ornalastyrylǵan, birge tamaqtanady. Sol arqyly bir-biriniń salt-dástúr, ádet-ǵurpymen jaqynyraq tanysyp, baýyrlastyq kúsheıe túsedi», dep atap ótti A.Jumakeev.
Belsendi is-qımyldarǵa deıin belarýstik dasantshylar taý daıyndyǵynyń negizderin ıgerdi. Polıgonda qajetti oqý oryndary daıyndaldy. Qazaqstan Desanttyq-shabýyldaý áskerleri alpilik rotalarynyń nusqaýshylary olardy qaýipsizdik sharalarymen, taý daıyndyǵy jabdyqtarymen, jabdyqtaý elementterimen, saqtandyrý jáne ózin-ózi saqtandyrý negizderimen, túrli toraptardy toqýmen, túsý, kóterý jáne sý tosqaýyldary arqyly ótý elementterimen tanystyrdy. Feldsherler kýrsy sheńberinde ózine-ózi kómek kórsetýge, alǵashqy medısınalyq járdemge jáne jaralylardy taý jaǵdaıynda tasymaldaýǵa erekshe nazar aýdaryldy.
Taýly jerlerde ómir súrý sabaqtarynda áskerı qyzmetshilerdi qolda bar quraldardan peshter salý, tutandyrǵysh zattar bolmaǵan kezde ártúrli tásildermen ot jaǵý nusqalarymen, sýdy zararsyzdandyrý jáne jergilikti flora men faýnadan tamaq daıyndaý tásilderimen tanystyrdy.
Praktıkalyq sabaqtarda eki eldiń desantshylarynyń birikken toptary jaýyngerlik atystardy qamtyǵan shabýyldaý men torýyldaýdy uıymdastyrý jáne júrgizý elementterin pysyqtady. Sondaı-aq Qazaqstan Desanttyq-shabýyldaý áskerleriniń qoldanysyndaǵy ushqyshsyz ushý apparattarynyń taktıkalyq-tehnıkalyq sıpattamalarymen, olardy bıik taýly jerlerde qoldaný múmkindikterimen tanysty.
Esterińizge salaıyq, jattyǵýǵa Qazaqstan men Belarýstiń 350-den astam desantshysy qatysyp jatyr. Onyń belsendi kezeńi osy aıdyń 17-19 kúnderi ótedi.
