Qaraǵandydaǵy Spassk ortalyǵynda I respýblıkalyq «Aıbyn» jastar jıyny ótýde
Aldyńǵy kúni Qaraǵandy oblysyna qarasty Spassk oqý-jattyǵý ortalyǵynyń bazasynda «Aıbyn» respýblıkalyq áskerı-patrıottyq jastar jıyny bastaldy.
Ol qazaqstandyq belsendi jastardyń 800-den asa ókiliniń basyn qosty. Oǵan qatysýshylar áskerı-patrıottyq klýbtardyń tárbıelenýshileri, áskerı-qoldanbaly sport túri boıynsha oblystyq jáne qalalyq jarystardyń jeńimpazdary. Sondaı-aq, Almaty, Qaraǵandy, Shymkent, Semeı, Pavlodar, Aqtóbe qalalaryndaǵy respýblıkalyq áskerı mektep ınternattarynyń, «Jas ulan» respýblıkalyq mektebi jáne «Arystan» lıseıiniń tárbıelenýshileri.
Jıynnyń ashylý rásiminde Qorǵanys mınıstriniń birinshi orynbasary – Bas shtab bastyǵy general-polkovnık Sáken Jasuzaqov qatysýshylarǵa arnap quttyqtaý sóz sóıledi. «Aıbyn» jıyny 10-13 maýsym aralyǵynda ótedi. Qatysýshylardy mazmundy baǵdarlama kútip tur. Onyń ishinde: beltemirge tartylý, 100 metrlik nysana kózdeý, áskerı-medısınalyq daıarlyq boıynsha jaraqat tańýdy úırený, protıvogaz skafandryn kııý sııaqty jattyǵýlar bar. Spassk oqý-jattyǵý ortalyǵynyń polıgonynda el áskeriniń jaraǵynda turǵan atys qarýynyń úlgileri, urys quraldary, optıkalyq aspaptar, 9 mm Makarov tapanshasy, 9 mm AKS tapanshasy kórsetildi. Onyń ishinde «Radıotosqaýyl» dabyldama kesheni de bar. Ol kúzetiletin aımaqtan 3 shaqyrym qashyqtyqta baıqalǵan is-áreketterdi anyqtaýǵa múmkindik beredi. Jıynǵa qatysýshylarǵa lańkestikke qarsy kez kelgen kedergilerdi buzyp ótetin «Robot-barlaýshy» júıesi erekshe áser qaldyrdy. «Bizde qabyrǵanyń arǵy betinde turǵan qarsylasty áshkereleýge múmkindik beretin radıolokasııalyq stansa da bar. Bul lańkestikke qarsy tapsyrmalar kezinde shyǵynsyz áreket etýge múmkindik beredi», – dep túsinik berdi jastarǵa áskerı qyzmetshiler. Sol jerde áskerı-patrıottyq klýb múshelerine ushqyshsyz ushý apparattary da kórsetildi. Jıynnyń basty mindeti – jastardyń áskerı-patrıottyq tárbıesin jetildirý, osy baǵyttaǵy klýbtardyń is-qımylyn úılestirý, jastardy Qarýly Kúshterdegi áskerı qyzmetke daıarlaý, olardyń boıynda áskerı qyzmetti óteý kezinde qajet daǵdylar men eptilikti qalyptastyrý.
Aıqyn NESIPBAI, «Egemen Qazaqstan».
Qaraǵandy oblysy.
