foto: Qaraǵandy oblysynyń Polısııa departamenti
Dál osy trassada 14 shilde kúni jolaýshylar avtobýsynyń qatysýymen jantúrshigerlik jol apaty bolyp, bes adam qaza tapqan edi. Oblystyq Polısııa departamentiniń baspasóz qyzmeti jol qozǵalysy erejelerin saqtaý qajettigi týraly birneshe ret eskertý jasaǵanymen joldyń osy bóliginde adam ólimine ákeletin jol-kólik oqıǵalary jalǵasyp jatqanyn atap ótti.
Áleýmettik jelide oqıǵa ornynan túsirilgen kadrlar paıda boldy.
Resmı málimet boıynsha, 17 shilde kúni tańǵy saǵat 06:00 shamasynda «Almaty-Ekaterınbýrg» tas jolynda Aqsý-Aıýly aýylynan bes shaqyrym jerde kele jatqan Chery Tiggo kóligi men Van Hool avtobýsy soqtyǵysqan.
Kadrlarda baıqalǵandaı, jeńil kólik soqqy áserinen birneshe bólshekke bólinip ketken.
Jan túrshigerlik oqıǵa saldarynan Chery Tiggo kóliginiń júrgizýshisi men eki jolaýshysy alǵan jaraqattarynan oqıǵa ornynda kóz jumdy, taǵy úsh jolaýshy men avtobýs júrgizýshisi aýrýhanaǵa jetkizildi. Oqıǵa kezinde avtobýsta 51 adam bolǵan.
«Atalǵan fakti boıynsha qylmystyq is qozǵaldy. Qajetti saraptamalar taǵaıyndaldy, tergeý amaldary júrgizilip jatyr. Aıta ketý kerek, jazda bir ǵana «Almaty - Ekaterınbýrg» tas jolynda kúnine 33 myńǵa deıin kólik júredi. Ekıpaj sany 22 brıgadaǵa deıin ulǵaıtyldy, al joǵaryda atalǵan kólikterdiń eki júrgizýshisin de Qaraǵandy oblysy aýmaǵyndaǵy patrýldik polısııa batalonynyń qyzmetkerleri toqtatyp, jol qozǵalysy erejelerin saqtaýdy eskertken edi», dep habarlady Qaraǵandy oblysy IID baspasóz qyzmeti.
Qaraǵandy oblysynyń Polısııa departamenti jol qozǵalysyna qatysýshylardy qyraǵy bolýǵa jáne belgilengen jyldamdyqty qatań saqtaýǵa shaqyrady.
«Jol belgileri men tańbalarǵa mán berińizder, jol qaýipsizdigi árqaısymyz úshin mańyzdy», dedi Qaraǵandy oblysynyń polıseıleri júrgizýshilerge.
