Mańǵystaý óńirinde elimizdiń Qorǵanys mınıstri, general-polkovnık Rýslan Jaqsylyqov Ázerbaıjan, Qyrǵyz Respýblıkasy, Tájikstan jáne О́zbekstannan kelgen áriptesterin senip tapsyrylǵan áskerı bólimshelerdiń oqý-jaýyngerlik múmkindikterimen jáne oqý-jattyǵýdy ótkizý sharttarymen tanystyrdy. Qorǵanys vedomstvolarynyń basshylary aldymen Qazaqstan Qarýly kúshteri Áskerı-teńiz kúshteriniń zymyran-artıllerııalyq kemesinde boldy. Onda delegasııa basshylary kemeniń jaýyngerlik múmkindikteri men oryndaıtyn tapsyrmalarymen tanysyp, súńgýir ortalyǵyna keldi. Oqý-jattyǵý kesheninde olarǵa jaýynger júzýshilerdi kásibı daıyndaý barysynda qoldanylatyn qarý-jaraq pen tehnıkalyq quraldar týraly maǵlumat berildi.
Budan keıin sheteldik qonaqtarǵa 25744 áskerı bóliminde teńiz jaıaý áskerlerin daıyndaý júzege asyrylatyn oqý trenajerleri kórsetildi. Delegasııa basshylary «Oımasha» polıgonynda áskerı qyzmetshilerdi ornalastyrý jáne tamaqtandyrý jaǵdaıymen tanysyp, qarý-jaraq pen áskerı tehnıkany teksergen soń áskerı atys alańyna keldi. Onda dostyq armııalary áskerı qyzmetshileri taktıkalyq atys elementterin sátti oryndap, atý kezinde keremet sheberlik pen dáldik kórsetti. Sonymen qatar qorǵanys vedomstvolarynyń basshylary «Batys» jedel qolbasshylyǵy áskerleri birikken tobynyń basqarý pýnktinde bolyp, onyń múmkindikterimen jáne oqý-jattyǵýdyń josparymen tanysty.
«Birlestik-2024» oqý-jattyǵýy aıasynda túngi ýaqytta qatysýshy memleketterdiń áskerı jaýyngerleri taktıkalyq is-qımyldardy tájirıbe túrinde kórsetti.
Áskerlerdiń birikken is-qımylyn baqylaý alańynan bes eldiń qorǵanysqa jaýapty basshylary túgel baqylap otyrdy. Aıta ketý kerek, «Oımasha» polıgonynda ótken soǵys qımyldary teatrynda qatysýshy elderdiń áskerı qyzmetshileri 17 taktıkalyq epızodty pysyqtady. Onyń bári Halıfat memleketin qurýǵa umtylǵan zańsyz qarýly qurylymdardy taýyp, olardyń kózin joıý jónindegi biryńǵaı oqý-jaýyngerlik tapsyrmalarǵa baǵyndy. Arnaıy operasııany sátti júzege asyrýda jer ústi jáne áýeden barlaý qyzmetteri mańyzdy ról atqardy.
Bandalyq qurylymdardyń bazalaryn tapqannan keıin, arnaıy maqsattaǵy toptar soqqy berý úshin armııalyq avıasııaǵa koordınattardy tapsyrdy. Sonymen qatar alǵy sheptegi bazalyq aımaqtardy, sodyrlardyń pozısııalaryn jáne olardyń baǵdary men qozǵalysyn izdeýdi jaýyngerlik ekıpajdar, Wing Loong, Orbiter jáne Puma ushqyshsyz ushatyn apparattaryndaǵy barlaý keshenderi júzege asyrdy. Bandalyq qurylymdardyń óristegen jeri artıllerııanyń kúshimen joıyldy. Jaý pozısııasynan ushyrylǵan drondar tobynyń shabýylyna áskerı qyzmetshiler radıoelektrondy kúres quraldarymen ózara is-qımyl jasaı otyryp, jyljymaly zenıtti zymyran keshenderimen jáne zenıttik qondyrǵylarmen toıtarys berdi. Osylaısha, zańsyz qarýly qurylymǵa barynsha zııan keltirý maqsatymen áskerler tobynyń birikken bólimsheleri basqarylatyn mına alańdary men artıllerııa kúshterin qoldanyp «ot qapshyǵyn» qurý boıynsha manevr jasady.
Jaý artıllerııasynyń atys shabýylyn toıtarýǵa tankke qarsy qol jáne stanoktyq granatometpen, reaktıvti jaıaý ásker otshasharymen, tankke qarsy zymyran keshenderimen jáne pýlemettermen jabdyqtalǵan utqyr toptar qatysty. Olardyń týnnelder arqyly sheginis jasaýy áskerı kontıngentter artıllerııalyq esep toptarynyń qoldaýymen júzege asyryldy. «Saq qorǵany» taktıkalyq tásilin oryndaý kezinde tank ekıpajdary úılesimdi qımyl kórsetti. Shabýylǵa toıtarys berýdegi ádistiń artyqshylyǵy – tankterdiń aıaq astynan paıda bolýy jáne shabýyldaýshy jeńiliske ushyraýy boldy. Zańsyz qarýly qurylym toptarynyń sytylyp ketýine atys shebinde ornalasqan rezervtik kúshter kedergi keltirdi. Operasııanyń sáttiligi aldyn ala tıimdi pozısııaǵa ıe bolǵan taktıkalyq áýe desantyn, sondaı-aq aralas avıasııalyq toptyń soqqylaryn engizý arqyly damydy. Odan ári áskerı manevrler Kaspıı jaǵalaýynda jáne Toqmaq múıisine jaqyn teńiz ýchaskesinde jalǵasty.
Eptiligi men jaýyngerlik daıyndyqty shyńdaýǵa negizdelgen «Birlestik-2024» jedel-taktıkalyq komandalyq-shtabtyq oqý-jattyǵýynyń sońy Toqmaq múıisindegi Kaspıı teńiziniń Qazaqstan sektorynda praktıkalyq is-qımyldardy pysyqtaýmen aıaqtaldy. Jospar boıynsha qurlyqtyń osy bóligine shoǵyrlanǵan sodyrlar tobynyń qaldyqtary aıtarlyqtaı shyǵynǵa ushyraıdy. Birikken áskerler tobynyń bólimsheleri barlaý júrgizip, mınaǵa qarsy qamtamasyz etý, aralyq bazany, qurlyqtaǵy jáne teńizdegi sodyrlardy joıý jumystaryn júrgizdi. Operasııaǵa áskerı-teńiz desanty men áýe desanttary, shabýyldaý eshelondary, mobıldi-atys toby qatysty. Olardyń áreketteri zymyran-artıllerııalyq kemelermen, artıllerııamen, armııalyq jáne maıdandyq avıasııamen qoldaý tapty.
Qatysýshylardy oqý-jattyǵýdyń aıaqtalýymen elimizdiń Qorǵanys mınıstri, general-polkovnık Rýslan Jaqsylyqov quttyqtady. Ol qarýly qaqtyǵysty oqshaýlaý jónindegi birlesken operasııa basqarý organdarynyń úılesimdiligin, jaýyngerlik ázirlikti jáne áskerı kontıngentter bólimsheleriniń jedel úılesimdiligin jetildirýge baǵyttalǵanyn jetkizdi. Áskerı qyzmetshiler bul tapsyrmany sátti oryndap, jaýyngerlik jaǵdaıdaǵy ózara is-qımyldyń oń tájirıbesin aldy.
– Oqý-jattyǵý josparyn iske asyrý barysy naqty jaýyngerlik jaǵdaılarǵa jaqyn modeldendi. Qaıta toptastyrý jáne birikken áskerler tobyn qurý máseleleri pysyqtaldy. Taktıkalyq epızodtardy oryndaý kezinde ártúrli qarý-jaraq pen áskerı tehnıka qoldanyldy, avıasııa, áskerı-teńiz kúshteriniń kemeleri, artıllerııalyq eseptoptar, áýe qorǵanysynyń zenıttik-zymyrandyq keshenderi, brondy jáne ınjenerlik tehnıka, ushqyshsyz ushý apparattary jumyldyryldy, – dep naqtylady ol.
Sondaı-aq Qorǵanys mınıstri bıyl qurlyqta jáne teńizde ótkizilgen oqý-jattyǵý tek aýqymymen ǵana emes, jeke quramnyń kásibı daıyndyq deńgeıimen de erekshelenetinin atap ótti.
– Qatysýshy elderdiń áskerı kontıngentteri bir sapta jaýyngerlik mindetterdi kelisip ári sheber oryndaýǵa daıyn ekendikterin dáleldedi. Birlesken oqý-jattyǵý óz maqsatyna qol jetkizdi jáne qoıylǵan mindetter tolyq kólemde oryndaldy dep esepteımin, – dedi R.Jaqsylyqov.
Rásim barysynda Ázerbaıjan Qorǵanys mınıstri Zakır Gasanov, Qyrǵyz Respýblıkasy Qorǵanys mınıstri Baqtybek Bekbolotov, О́zbekstan Qorǵanys mınıstri Bahodır Qurbanov jáne Tájikstan Qarýly kúshteri Bas shtaby bastyǵynyń birinshi orynbasary Saıdasror Saıd Abdýllozoda sóz sóıledi. Oqý-jattyǵýdy uıymdastyrýshylarǵa alǵysyn bildirgen delegasııa basshylary daıyndyqtyń joǵary deńgeıin atap ótti. Qatysýshy elder qarýly kúshteriniń yqtımal agressııalyq aktilerdi toıtarýǵa jaýyngerlik ázirligin nyǵaıtýǵa qyzmet etetinine senim bildirdi.
Oqý-jattyǵý sońynda qatysýshy elder Qorǵanys mınıstrleriniń buıryqtarymen birqatar áskerı qyzmetshi halyqaralyq yntymaqtastyqty damytýǵa qosqan úlesi úshin medalmen jáne estelik kádesyılarmen marapattaldy. Is-shara áskerı kontıngentter leginiń saltanatty sherýimen aıaqtaldy.
