Jıynnyń negizgi maqsaty – kásibı-laýazymdyq daıarlyq deńgeıin arttyrý, sondaı-aq Ishki ister mınıstrliginiń quqyqtyq aktileriniń talaptary týraly biryńǵaı túsinik qalyptastyrý. Sabaq kestesine sáıkes jıyndardy ótkizý baǵdarlamasynda demonstrasııalyq, nusqaýshy-ádistemelik jáne praktıkalyq sabaqtar ótkizý kózdelgen. Sondaı-aq ofıserlerge áskerdiń qyzmettik-jaýyngerlik is-áreketiniń negizgi basymdyqtaryn aıqyndaıtyn basshylyq qujattar men dırektıvalardyń erejeleri túsindiriledi.
Sabaqtyń negizgi bóligi elordalyq brıgada bazasynda, sondaı-aq Ulttyq ulannyń «Qaptaǵaı» birikken oqý ortalyǵynda jáne Memlekettik kúzet qyzmetiniń «Maılan» oqý polıgonynda ótedi. Jıynnyń birinshi kúni ofıserlermen tikushaq alańdaryn jabdyqtaý tártibi boıynsha keshendi sabaqtar, tegis uńǵyly myltyqtarmen atý jáne granata laqtyrý, jıyntyq taktıkalyq toptardyń jaýyngerlik tártibin kórsetý, sondaı-aq «Daǵdarys jaǵdaıynda aqparattyq keńistiktegi qaýip-qaterlerge qarsy is-qımyl» taqyrybynda memlekettik-quqyqtyq daıyndyq boıynsha dáris ótkizildi.
Jıyn jetekshisi, jaýyngerlik daıarlyq bas basqarmasynyń bastyǵy Nurlan Muhamedovtiń aıtýynsha, jıyn mindeti laýazymdy tulǵalardyń kásibı deńgeıin arttyrýda biryńǵaı tásildi ázirleý, ozyq tájirıbemen almasý, komandırlerdiń atys, dene shynyqtyrý jáne ádistemelik daıarlyǵyn tekserýge baǵyttalǵan.
– Osyndaı sabaqtardyń arqasynda ofıserler ózderiniń fýnksıonaldyq mindetterin sheber jáne senimdi oryndaý úshin kásibı daıyndyqty jetildiredi. Sondyqtan Joǵarǵy Bas Qolbasshynyń, Ishki ister mınıstriniń jáne Ulttyq ulan Bas Qolbasshysynyń tapsyrmasyna saı jańa formatta Ulttyq ulan jeke quramynyń jaýyngerlik daıarlyq deńgeıin arttyrýǵa basty nazar aýdaramyz, – deıdi polkovnık Nurlan Muhamedov.
«Maılan» oqý polıgony bazasynda quqyqtyq tártip áskerindegi qarý-jaraq jáne tehnıka túrlerinen praktıkalyq atys normatıvterin pysyqtaýǵa arnalǵan praktıkalyq sabaqtar ótkizilip, úzdik nátıje kórsetken ofıserler marapattaldy.
