Sharaına
AQSh prezıdenti Barak Obama el ekonomıkasynyń resessııadan keıin tabysty qalpyna kelip, sońǵy kezderi turaqty ósimge qol jetkizilgenin málimdedi. Bul málimdemesin prezıdent Kongreste jasady.
Obamanyń sózine qaraǵanda, jańa jumys oryndaryn qurý 1999 jyldan beri alǵash ret joǵary qarqynda júzege asyrylyp jatyr eken. Al jumyssyzdyq deńgeıi qarjy daǵdarysyna deıingi kezden tómendepti. Endi AQSh prezıdenti eki apta ishinde Kongreske ekonomıkany ári qaraı nyǵaıtý men áleýmettik salany reformalaýǵa baǵyttalǵan bıýdjet usynymdamalarynyń paketin jiberýge ýáde berip otyr. Qysqasy, Obama sońǵy kezderi AQSh ekonomıkasy qol jetkizgen birqatar tabystardy atap kórsetken.
Búlikshiler prezıdent saraıyn basyp aldy
Iemenniń astanasy – Sana qalasynda muzdaı qarýlanǵan shııttik sodyr-hýtıler prezıdent saraıyn basyp aldy. Bul týraly «Reıter» agenttigi aqparat taratty. Al buǵan deıin habarlanǵanyndaı, memleket basshysy Abda ál-Rahman Mansur ál-Hadı saraıynyń janynda áskerı bólimsheler men shııt búlikshileri arasynda qaqtyǵys bolǵan edi.
Prezıdenttiń ózi qaıda júrgeni belgisiz. Oqıǵa kýágerleriniń sózderine qaraǵanda, jaýlasýshy taraptar iri kalıbrli pýlemetter men mınometter qoldanǵan. Buǵan deıin búlikshiler úkimet áskerleri men shııt búlikshileri arasynda qol jetkizilgen bitimgershilikke qaramastan, premer-mınıstr Haled Mahfýz Bahahtyń kortejin atqylaǵan bolatyn. Munyń aldynda, buǵan deıin de habarlaǵanymyzdaı, hýtıler Iemen prezıdenti ákimshiliginiń basshysy Ahmed Avad ben Múbárakty urlap ketken edi.
Munaı óndirý eki eseden astamǵa azaıady
2030 jylǵa qaraı munaı óndirý eki esege deıin qysqaryp, táýligine 50 mıllıon barrelge deıin ǵana jetetin bolady. Bul týraly Davos forýmynda sóılegen sózinde fransýzdyń «Total» munaı-gaz kompanııasynyń basshysy Patrık Pýıanne málimdedi.
Onyń sózine qaraǵanda, munaı óndirý kólemin burynǵy deńgeıde ustap turý úshin orasan zor ınvestısııalar qajet bolatyn kórinedi. Sondaı-aq, ol dúnıejúzine barǵan saıyn qýat kózi kóp qajet etiletinin, munda kómirsýteginiń úlesi taıaýdaǵy jıyrma jyl ishinde shamamen 70 paıyz deńgeıinde saqtalyp qalatynyn atap kórsetti. Sonymen qatar, Pýıanneniń boljamynsha, orta merzimdik perspektıvada munaı baǵasy burynǵy deńgeıine qaıtyp keledi. Bul boljamyn ol munaı-gaz ındýstrııasy damýynyń sıkldiligimen túsindirdi.
Arab elderimen alıans qurǵan tıimdi
Eýropalyq odaqtyń Syrtqy ister jáne qaýipsizdik saıasaty jónindegi Joǵarǵy ókili Federıka Mogerını arab elderimen birigip, antıterrorlyq alıans qurýǵa shaqyrdy. Bul týraly «Assosheıted Press» agenttigi habarlady.
Eýropalyq odaq keńesiniń halyqaralyq qatynastarǵa arnalǵan májilisi barysynda EO-ǵa múshe keıbir elder syrtqy saıasat vedomstvolarynyń basshylary musylmandardy terrorızmge qatysty aıyptaýdyń ornyna, olarmen yntymaqtasý qajet degen pikir bildirgen bolatyn. Máselen, Ulybrıtanııa syrtqy ister mınıstri Fılıp Hammondtyń sózine qaraǵanda, Eýropalyq odaqty qorǵaý úshin arab elderimen qazirgiden de tyǵyz ózara is-qımyl qajet.
Ushaq apatynyń sebepterin aıtpaıdy
Indonezııa basshylyǵy ótken jyldyń 28 jeltoqsanynda teńizge qulaǵan AirAsia jolaýshylar ushaǵy apatynyń sebepteri týraly aldyn ala baıandamany jalpyǵa jarııa etpeý týraly sheshim qabyldap otyr. Bul týraly «Reıter» agenttigi habarlady.
Mundaı sheshim qabyldaýǵa neniń sebep bolǵany belgisiz. Jaýapty adamdar aldaǵy aptanyń basynda tekserý qujattaryn Halyqaralyq azamattyq avıasııa uıymyna usynady dep kútilýde. Erejege sáıkes, tekserýdiń aldyn ala nátıjeleri vedomstvoǵa apat bolǵan sátten keıingi otyz kún ishinde berilýi tıis. Jalpy, sońǵy kezderi Malaızııa tasymaldaýshylary birqatar kútpegen oqıǵalarǵa tap kelip otyr. Bul bir jyl kóleminde ushaqtar apatqa ushyrap, barlyq jolaýshylar men ekıpaj músheleri túgeldeı qaza tapqan osyndaı úshinshi oqıǵa bolatyn.
Qarýly jasaq talaby – 200 mıllıon dollar
«Islam memleketi» qarýly jasaǵy japonııalyq kepildikke alynǵandar úshin 200 mıllıon dollar kóleminde aqy talap etti. Aqsha olardyń qolyna 72 saǵat ishinde tııýi tıis eken. Bul jóninde «Assosheıted Press» agenttigi ınternetke ornalastyrǵan beıneúndeýde aıtylady.
Beıneúndeýde bir terrorshy men eki kepildikke alynǵan azamat kórsetilgen. Boljam boıynsha, olar japonııalyq Kendzı Goto Dzego men Harýna Iýkava delinip otyr. Japondyqtarǵa qaıyrylǵan búlikshi bylaı deıdi: «Sender bizdiń áıelderimiz ben balalarymyzdy óltirip, musylmandardyń (...) úılerin qıratý úshin esh oılanbastan 100 mıllıon dollar berdińder. Myna ekeýin qutqarý úshin endi 200 mıllıon dollar tóleńder, áıtpese ekeýi de pyshaqqa iligedi». Japon jaǵy beıneúndeýge qatysty ázirshe eshqandaı túsinikteme bergen joq. Sońǵy kúnderi «IM» búlikshileri kepildikke alynǵandardyń ishinen 5 adamdy óltirgen edi.
Qysqa qaıyryp aıtqanda:
*AQSh prezıdenti Barak Obama men Fransııa prezıdenti Fransýa Olland telefon arqyly sóılesý kezinde Reseıge qarsy sanksııalardy ustaı turý qajettigi týrasynda pikir bildirdi. Sondaı-aq, taraptar Ýkraına úkimetin qarjylaı qoldaýdyń mańyzdylyǵymen kelisken.
*Reseı men Iran S-300 zenıtti-zymyrandyq keshenin satý-satyp alýda paıda bolǵan pikir qaıshylyqtaryn joıý úshin kelissózderdi jalǵastyrýǵa kelisti. Aldaǵy kelissózderdiń egjeı-tegjeıi ázirge belgisiz. Al Iranǵa S-300 keshenin satý týraly kelisimshartqa 2007 jyly qol qoıylǵan edi. Kelisim quny – 800 mln. dollar.
*Saýd Arabııasynda jasy 30-dan asqan kúıeýge tımegen áıelder sany 1,5 mıllıonnan asyp ketken. Bul – koroldiktegi barlyq áıelderdiń úshten biri degen sóz. Jergilikti turǵyndar úkimetti osy problemany sheshý úshin shara qoldanýǵa shaqyrdy. Shara naqty neni meńzeıtini bizge belgisiz.
*Antarktıdada baılanys úzilip qalǵan Reseı Memlekettik Dýmasynyń depýtattary Oleg Savchenko men Aleksandr Sıdıakın qurlyqtyń eń joǵary núktesine Reseı týyn tikken. Depýtattar baılanys ornaǵan soń osylaısha Vınson shyńyna shyǵýdaǵy ózderiniń basty maqsattaryn oryndaǵanyn jetkizgen. Shyńnyń bıiktigi 4897 metrdi quraıdy.
Internet materıaldary negizinde ázirlendi.
