Kollajdy jasaǵan Záýresh Smaǵul, «EQ»
Memlekettik kirister komıtetiniń habarlaýynsha, bankrot atanýǵa qatysty úderis kezinde maquldaý almaýdyń bir sebebi – qaryzdy retteý boıynsha júrgizilgen sharalar týraly qujattyń joqtyǵy. Endi atalǵan talap alynyp tastalýy múmkin. Qarjy mınıstri Mádı Tákıevtiń aıtýynsha, qazir bankrottyq úderisin qıyndatatyn talaptardy joıý máselesi qarastyrylyp jatyr.
«Jeke tulǵa eshqandaı artyq áreketsiz ótinim bere alady. Solaı ońtaıly bolmaq. Sonymen qatar zańnamalyq deńgeıde tutynýshylyq nesıe túsinigin engizý usynylyp otyr. Sondaı-aq bankter úshin soma 5 mln teńgeden assa, mıkroqarjy uıymdary úshin soma 3 mln teńgeden assa, ondaı nesıelerdi berilmeıtin etetin tetik engizilmek. О́zgertýler tólem qabiletin qalpyna keltirý prosedýrasyna da qatysty», deıdi mınıstr.
Dármensiz boryshkerlermen jumys basqarmasynyń basshysy Merýert Seısembaeva da bankrottyq máselesinde yńǵaıly ózgeristerdiń bolatynyn aıtady.
«Eger qazirgi kúnde tólem qabiletin qalpyna keltirý úderisi qaryz beresheginiń tólenbegenine bir jyldan asqan azamattarǵa ǵana qoldanylsa, endigi ózgerister bul normany biraz jaqsartpaq. Nesıe tólemderi boıynsha problema týyndaǵan jaǵdaıda olar 12 aıdy kútpeı-aq, osy úderiske júgine alady. Iаǵnı kredıtormen retteý úderisi tólem qabiletin qalpyna keltirý úderisi aıasynda júrgiziledi. Sondaı-aq buǵan deıin azamattyń shetelge shyǵýyna tyıym salynsa, endi bul shekteý de alynyp tastalady», deıdi.
Mamannyń aıtýynsha, bul sharalardyń bári nesıeleý kezindegi táýekelderdi aıtarlyqtaı tómendetedi dep kútiledi. Degenmen azamattar bankrot ataný múmkindigin «aıryqsha qamqorlyq» dep uǵynýǵa tıisti emes. О́ıtkeni bankrot atanǵan adam 5 jyl boıy eshqandaı qarjy uıymynan qaryz ala almaıdy jáne 3 jyl boıy turaqty baqylaýda bolady.
«Árıne, barlyq bank birdeı bankrottyq týraly zańdy qabyl ala qoımaıdy. О́ıtkeni qaryzdy keshirý bankterdiń moınyna júk bolyp túsedi. Olar ózderiniń rezervtik provızııasy esebinen azamattardyń qaryzyn keshiredi. Bir jaǵynan olar qanshama jyl boıy boryshkerlerdiń osy problemasyn sheshe almasa, onda nege bankrot dep tanymasqa?
Jyl basynan beri 3 600 adam bankrot dep tanylǵan. Olardyń jalpy bereshegi – 9 mlrd teńge.
