10-11 maýsymda «Qazaqstan temirjoly» UK» AQ prezıdenti Asqar Mamın bastaǵan Qazaqstan temirjolshylarynyń delegasııasy jumys saparymen Úndistanda boldy. A.Mamın Úndistanda bolǵan kezinde osy el temirjol, sý joly jáne avtojol mınıstrlikteriniń basshylyǵymen birqatar ekijaqty kezdesýler ótkizdi, dep habarlady «QTJ» UK» AQ-tyń baspasóz qyzmeti.
Kezdesýler kezinde «Soltústik – Ońtústik» dálizin esepke ala kelgende, eki el arasyndaǵy kólik áleýetin aıqyndaý máselelerine jáne Úndistan men Eýrazııa qurlyǵynyń asa iri rynoktary arasyndaǵy taýar aǵynyn qamtamasyz etetin tıimdi logıstıkalyq tizbek qurýdyń múmkindikterin qarastyrýǵa basa nazar aýdaryldy. Máselen, Asqar Mamınniń Úndistannyń Sý joly jáne avtojol mınıstri Nıtın Gadkarımen jáne Temir jol mınıstri Sýresh Prabhýmen kezdesýleri kezinde eki el arasyndaǵy kóliktik yntymaqtastyqty damytýdyń perspektıvalary talqylanyp, «Soltústik – Ońtústik» kólik dáliziniń bir bóligi retinde «Qazaqstan – Túrikmenstan – Iran» temirjol dáliziniń zor áleýetin paıdalaný arqyly taýarlar qozǵalysyn jeńildetýge jaǵdaı týǵyzatyn ýaǵdalastyqtarǵa qol jetkizildi. Budan bólek, 80-nen astam ónerkásiptik jáne kóliktik qaýymdastyqtardyń basyn biriktiretin Úndistannyń Saýda-ónerkásip palatasy federasııasynyń ofısinde osy el bıznes-toptary úshin óńirde eksporttyq-ımporttyq operasııalardy júzege asyrýdyń logıstıkalyq múmkindigine arnalǵan tusaýkeser ótkizildi. Mýndra teńiz portynda bolǵan kezinde Qazaqstan temirjolynyń delegasııasy damý jobalarymen tanysyp, iri logıstıkalyq kompanııalarmen kelissózderge qatysty.
Sýret: alashainasy.kz
