Jarty ǵasyrdan asa tarıhy bar ansambldi Qaraǵandy oblysy men Qarqaraly aýdanynyń basshylyǵy qoldap, óner baıqaýyna arnaıy shaqyrtýmen attanǵan edi.
Kezinde arnaıy shaqyrtýlarmen jarty álemdi sharlaǵan, qazaq ónerin talaı elge tanystyrǵan óner ujymy keıingi jıyrma jyldyń ishinde alys saparlardan shektelip qalǵandaı edi. Mine, uzaq kútken sapardan oljaly oralyp, jerlesterin shattyqqa bólep jatyr.
Jarty ǵasyr ishinde óner ujymynyń quramy árdaıym tolysyp, jańaryp otyrdy. Bul joly tanymal óner maıtalmany Temirbek Syzdyqov daıarlaǵan, otyz bes adamnan quralǵan án-bı ansambli Eýropa tórine myqty ázirlikpen barypty. Repertýary baı ansambl polıak elinde laıyqty óner kórsetip, qazaqtyń áni men bıine álem halqyn tamsandyryp qaıtqany aıǵaq oǵan.
Dúnıeniń ár túpkirinen jınalǵan óner ujymdary aldymen birneshe topqa bólinip, Polshanyń Legnısa, Losıse, Shprotava, Polkovıse, Hoınýv, Verchıse, Volýv, Polıanısa-Zdrýı, Rýdno, Zamenıse eldi mekenderinde konsert qoıdy. «Saltanat» án-bı ansambli festıval baǵdarlamasy boıynsha Legnısa qalasynda óner kórsetti. Festıvaldiń taǵy bir ereksheligi – oǵan qatysqan ónerpazdar sahnada ǵana emes, ár qalanyń ortalyq kóshelerinde bolatyn halyqtyq sherýlerge de qatysady. О́z elderiniń ónerin pash etedi. Festıvalda ár memlekettiń ókilderi óz halqynyń sahnalyq ónerimen qatar salt-dástúrlerin, ulttyq qolóner jáne taǵam ónimderimen de tanystyrady.
Uıymdastyrýshylardyń mundaǵy maqsaty – dúnıe júzine álem halyqtarynyń ulttyq dástúrleri men ónerin dáripteý. Sol arqyly beıbitshilikti, birlikti nasıhat etý. Festıval shyraıyn Gala-konsert, basqa da merekelik keshter asha túsken.
On kúnge sozylatyn óner jármeńkesiniń aıasynda jerlesterimiz Legnısa qalasy basshylyǵynyń qurmetti qabyldaýynda da bolady.
Munymen qosa, osy bir óner dodasy «Świat Pod Kyczerą» halyqaralyq folklor festıvaliniń áleýmettik jelidegi paraqshalary men arnalary arqyly tikeleı efırden kórsetilip otyrdy.
Eýropa tórinde úzdik óner kórsetip, elge oljaly kelgen «Saltanat» halyqtyq án-bı ansambli ujymyn jerlesteri sán-saltanatpen qarsy aldy.
Qaraǵandy oblysy,
Qarqaraly aýdany
