Kórmede qazaq beıneleý óneriniń klassıkalyq týyndylarynan bastap, qazirgi zamanǵy qylqalam sheberleriniń jaýharlary usynyldy. Joba kýratory retinde ónertaný professory Olga Batýrına men óner salasyndaǵy bilim berý, medıa jáne marketıng baǵyttary boıynsha jumys isteıtin otandyq joba «Art Society» toby shaqyrylǵan.
Alǵashqy quttyqtaý sózdi mýzeı dırektorynyń orynbasary Aqmaral Ibraeva jetkizdi. «Kórmeni uıymdastyrýdaǵy basty maqsatymyz – ultymyzdyń bolmysy, ádet-ǵurpy men mádenıetin kórsetý. Osy kórmeniń aıasynda katalogtyń shyǵýynyń ózi mundaǵy túrli beıneleý óneri týyndylarynyń arnaıy ǵylymı turǵyda halyqqa jetýi men nasıhattalýyna yqpal jasaıtyn ıgilikti is», dedi ol.
Kórme kýratory Olga Batýrına ekspozısııalardyń ult rýhanııatynyń bet-beınesin sheber beıneıleıtin tóltýmalyǵy arqyly tańdalǵanyn aıtty. «Biz qazaq ulttyq keskindeme mektebiniń damý tarıhyn biregeı, dara, jarqyn qubylys retinde kórsete otyryp, mereıtoılyq kórmeniń elimizdiń mádenı ómirindegi aýqymdy oqıǵalardyń birine aınalǵanyn, onyń barlyq óner súıer qaýymnyń jáne qazaq keskindemesiniń esigin alǵash ashyp jatqan jandardyń nazaryn otandyq ónerge aýdarýdy qaladyq. Bul kórmede biz merekelik kóńil-kúı jasap, qazaq keskindeme tarıhyndaǵy eń jarqyn, eń jaqsy ári mańyzdy týyndylardy kórsetkimiz keldi», dedi O.Batýrına.
Kórme «Babalar rýhy», «Otbasy. Mahabbat. Kóktem. Balalyq shaq», «Sheberler men jaýharlar», «Taýlar men dala poezııasy» jáne zamanaýı qazaq óneriniń panoramasy usynlyǵan bes bólimnen turady.
