Álemdik jáne dástúrli dinder lıderleri V seziniń keshegi jalpy otyrysy men jabylý saltanatyna Elbasy Nursultan Nazarbaev qatysty. Jalpy otyrysty Parlament Senatynyń Tóraǵasy, sezd Hatshylyǵynyń Basshysy Qasym-Jomart Toqaev ashyp, júrgizip otyrdy. Ol keshegi otyrystarda syndarly pikirler aıtylǵanyn aýyzǵa alyp, sezd jumysynyń joǵary deńgeıde ótip jatqanyn atap kórsetti.
Jalpy otyrystaǵy alǵashqy sózdi Q.Toqaev forýmǵa qatysý úshin arnaıy kelgen Iordanııa Koroli II Abdallaǵa berdi. Qazaqstan – Shyǵys pen Batysty baılanystyryp otyrǵan alyp memleket. Sonshalyqty aýmaǵyna saı Qazaqstannyń Shyǵys pen Batys rýhanııatyn, órkenıetin jaqyndastyryp otyrǵanyna tántimin. Búgingi tańda osyndaı únqatysý alańy óte qajet. Zamanaýı qaterler eshkimdi de beı-jaı qaldyrmaıdy, olarǵa qarsy birlesken sharalar qoldansaq qana zaýaldardy aýyzdyqtaı alamyz. Barlyq din ókilderi úshin álem ortaq, bárimiz úshin ol jalǵyz. Qazir jahandyq qoǵamdastyǵymyzǵa qater tónip tur. Din atyn jamylǵandar bárimizge ortaq qater tóndirýde. Sonyń ishinde Islam álemi de bul qaýipten tys qalyp otyrǵan joq. Ásirese, zorlyq-zombylyq áreketterge jastardy tartýshylardyń qaýpi zor. Olar shaǵyn top bolsa da zııandylyǵy jyldam taraýda. Týrasyn aıtatyn bolsaq, olardyń qasıetti Islamǵa eshqandaı qatysy joq. Alaıda, bir qumalaq bir qaryn maıdy shiritýi múmkin. Sondaılardyń Alla atyn jamylǵanyna qaraı, jurttyń bári musylmandardan teris aınalmaýy kerek. Kerisinshe, bárimiz birlese otyryp, osyndaılarǵa qarsy kúsh biriktirýge tıispiz. Sonyń ishinde musylman qaýymynyń belsendiligi zor bolǵany jón. Iordanııanyń resmı ustanymy da osyndaı. Biz dinderdiń bir-birin qurmetteýin, bir-birine tózimdilik tanytýyn qalaımyz. Terrorızm men ekstremızmge qarsy birlesken keshendi sharalar ǵana álemdegi beıbit ómirdi saqtap qala alady. Sonymen birge, daǵdarysty aımaqtarda ómir súrip jatqan halyqtyń taǵdyryna aralasyp, olarǵa kómek qolyn sozý bárimizdiń mindetimiz, deı kelip, sóziniń aıaǵynda Iordanııa Koroli shyn musylman barlyq adamdy baýyrym dep sanaıtynyn atap kórsetti. Islam dini – shynaıy senim dini, olar bir-birimen kezdesip, amandasqanynyń ózinde aldymen beıbit ómir tileıdi, dedi II Abdalla.
Kelesi sóz BUU О́rkenıetter alıansynyń joǵary ókili Naser Abdelazız ál-Nasırge berildi. О́ziniń sózin ol Qazaqstandaǵy dinı ahýal jáne etnostyq qarym-qatynas týraly aıtýdan bastady. Qanshama kópetnosty jáne kópkonfessııaly bolsa da Qazaqstan bıligi olardyń arasynda beıbit ómir ornatyp otyr, osynyń ózi búkil álemge úlgi bolarlyq, dedi ol. Bizdiń álemimiz búgingi kúni teńdessiz turaqsyzdyq jaǵdaıyn basynan keshirýde. Sondyqtan da bizdiń búgin naǵyz ádiletti jáne beıbit jolǵa umtylyp, sol úshin jınalyp otyrǵanymyzdy bárimizdiń Allanyń aldyndaǵy adal isimiz dep tanýymyz kerek. Búgingi kúni uıymdasqan qylmystar, esirtki bıznesimen aınalysatyn júzdegen top mıllıondaǵan adamnyń ómirine qaýip tóndirýde. Onyń ústine, osyndaı qaterler memleketter arasyndaǵy shekaralyq kedergilerden asyp túsip jatyr. Búgingi álem bizdiń 20 jyl burynǵy álemimizden múlde bólek. Innovasııalyq jańalyqtardyń kóbin qylmystyq toptar óz paıdasyna uqsatyp ketýde. Ásirese, jastardy túzý joldan taıdyrýǵa olardyń yqpaly zor. Mine, osyndaı qasiretterge tek dinı kóshbasshylardyń belsendi áreketteri ǵana qarsy tura alady ǵoı dep oılaımyn. Sanalarǵa ımandylyq, rýhanı tazalyq uryǵyn sebý ǵana jastardy buzylýdan saqtaıdy. Biz BUU О́rkenıetter alıansynyń janynan osyndaı istermen aınalysatyn keńes quryp jatyrmyz. Din qaıratkerleri osy keńes arqyly jastarǵa úndeý jarııalap, olardy túzý jolǵa tartýǵa yqpal eter degen úmittemiz. BUU tarapynan bul iske qoldaý bildirilýde, dedi ál-Nasır.
Kelesi sóz Mınsk jáne Slýsk mıtropolıti, Búkil Belarýs patrıarhy Pavelge berildi. Qasym-Jomart Toqaev onyń keshe Máskeý jáne Búkil Reseı patrıarhy Kırılldiń sezge arnaǵan sálemhatyn jetkizgenin atap ótti. Mıtropolıt Pavel de óziniń sózin sezdi uıymdastyrýshylarǵa degen alǵystan bastady. Men ony óte aýqymdy halyqaralyq forým dep sanaımyn. Adamzat búgingi kúni kúrdeli ahýalǵa tap bolyp otyr, osyndaı únqatysý alańdarynyń bolǵany jáne ondaǵy kelisim ǵana júrekterge bolashaqqa degen senim uıalatady. Búgingi kúni ǵasyrlar boıy qalyptasqan ımandylyq murattary aıaqasty etilip, burmalanýda. Sóıtip, olar teris pıǵylda paıdalanylýda. «О́ziń úshin ǵana ómir súr» degen ózimshil qaǵıdat beleń alyp tur. Qorshaǵan ortaǵa degen egoıstik qatynas bir-birimizge degen óshpendilikke alyp keldi. Osynyń kesirinen jergilikti qaqtyǵystar, dinge negizdelgen shıelenister órshı túsýde. Sondyqtan biz asyl dinderimizdegi adamı qundylyqtarymyzdy jańǵyrtyp, jastardyń olardy qabyldaýyna áser etetin sharalarǵa jappaı kiriskenimiz abzal. Ozyq úlgiler arqyly dástúrli etıkalyq qaǵıdattardyń kúsh alýyna úles qosýymyz kerek. Tek din ıeleri emes, búkil qoǵam ımandy bolǵanda ǵana adamzattyń alǵa senimmen aıaq basýyna jol ashylady. Sonymen qatar, qaýipsizdiktiń eń basty kepili – dinder arasyndaǵy yntymaqtastyq ekenin umytpaıyq, dedi sóziniń sońynda mıtropolıt Pavel.
Sóz kezegi ózine tıgende EQYU-nyń Bas hatshysy ıtalııalyq Lamberto Zaner óziniń sezge qatysyp otyrǵanyna qýanyshty ekenin jetkizdi. Odan ári ol EQYU jumysynyń baǵdarlary týraly anyqtama bere kelip, din lıderleriniń sezi onyń negizgi qaǵıdattaryna saı, ıaǵnı aımaqtyq jáne álemdik qaýipsizdikke úles qosatynyna senimdi ekenin bildirdi. Zorlyq-zombylyq pen ekstremızmdi dástúrli jáne álemdik dinderdiń bári de joqqa shyǵarady. Adamdarǵa olardyń Qudaı isine qarsy ekenin ýaǵyzdaıdy. Kerisinshe, ekstremıster din atyn jamylyp, zorlyq-zombylyqty nasıhattaıdy. Sondyqtan ekstremızmdi dinnen bólek, oǵan qarsy áreket ekenin áshkereleýdiń mańyzy zor. Osy turǵyda bizdiń uıym da birqatar sharalar uıymdastyryp otyr. Sonyń ishinde Jerorta teńizi boıyndaǵy qaýipsizdik máselesine arnalǵan konferensııa bıyl Iordanııada ótetin boldy. Astanadaǵy osy únqatysý alańy da ózara túsinistikti keńeıte túsedi dep sanaımyn. Demek, onyń da halyqaralyq qaýipsizdikke qosyp jatqan úlesi úlken. Dinı ekstremızm, fanatızm sııaqty túsinikterdiń jáne olardyń zııandylyqtaryn din lıderleriniń áshkereleýiniń mańyzy zor. Dinı turǵydan bilim berý, osy baǵyttaǵy aǵartýshylyq jumystar pozıtıvti ustanym bolyp tabylady. Sonyń ishinde terrorıstik toptardyń, teris ıdeologııalardyń dinı senimnen múlde teris áreketpen aınalysatynyn da jastar arasyna keńinen taratqan durys bolar edi.
Bárimizge ortaq beıbitshilik murattaryn nasıhattaýǵa berilgen búgingideı tamasha múmkindik álemdik beıbitshiliktiń nyǵaıýyna yqpal etedi degen úmittemin, dedi Bas hatshy sóziniń sońynda. Kelesi sóz Kenterberı arhıepıskopynyń ókili, aǵylshyn shirkeýiniń epıskopy Rıchard Atkınsonǵa berildi. Birinshi kúngi jalpy otyrysta ol Kenterberı arhıepıskopynyń sezge arnaǵan quttyqtaý sózin oqyp bergen bolatyn. Endi óziniń sezge arnaǵan sózin aıtty. Osy forým arqyly biz ózara yntymaqtasýdyń basty baǵyttaryn talqylap otyrmyz. Biz bir-birimizdi qoldap, qurmet kórsetý arqyly ekstremıstik, radıkaldyq toptardyń jaýyqqysh nıetine toıtarys berip, olardyń ıdeologııasynyń teristigin áshkereleımiz. Osyndaı forýmdardy keńeıtip, jıi jáne kólemdi túrde ótkize berý kerek dep sanaımyn. Adamdardyń sanasyna zorlyq-zombylyqqa, ózinikin ǵana durys dep sanaıtyn birjaqtylyqqa oryn bolmaý kerektigin din qaıratkerleri meılinshe keń kólemde nasıhattaı berýi kerek. Odan ári epıskop Kenterberı shirkeýiniń Anglııa qoǵamyndaǵy túsinistik pen kelisimdi saqtaý baǵytynda atqaryp jatqan jumystaryna toqtalyp ótti. Sonyń ishinde «Bizdiń jaqyn kórshilerimiz» degen baǵdarlamany iske asyryp jatqandaryn aıtty. Bul baǵdarlama boıynsha basqa dinderdi tutynatyn kórshilerge degen tózimdilik, olardyń senimin syılaý baǵytynda halyqqa nasıhat júrgiziledi. Baǵdarlama Anglııanyń qalalary ǵana emes, aýyldyq jerlerin de qamtyǵan. Oǵan bılik tarapynan da qoldaý bildirilip, onyń belsendilerine 5 myń fýnt sterlıngke deıin grant beredi. Sońǵy 4 jyl ishinde joba úlken oń nátıjelerge qol jetkizdi, dedi ol. Kezegi kelgende «Djındjıa Honche» sıntoızm hramdary qaýymdastyǵynyń atqarýshy dırektory Tanenorı Teraı (Japonııa) óz sózin aıtýly sharany uıymdastyryp otyrǵan Qazaqstan memleketine, Prezıdent Nursultan Nazarbaevqa alǵys bildirýden bastady. Budan ary Japonııa ókili álem boıynsha ekonomıkalyq damý máselesine kóbirek kóńil bólinip, rýhanı qundylyqtarǵa sonshalyqty nazar aýdaryla bermeıtinin, sonyń sebebinen túrli qıyndyqtar, kesirli keleńsizdikter órship bara jatqanyn aıta kelip, Japonııada da osyndaı úrdis qalyptasqanyn jetkizdi. Tanenorı Teraıdyń aıtýynsha, rýhanı-mádenı baılyqtardy nasıhattaýdyń, ony adamzat ómiriniń negizi retinde baǵalaı bilýdiń mańyzy zor. Álemdik syn-qaterlerdi azaıtý, yqtımal qaýipterdiń aldyn alý úshin rýhanı qundylyqtarǵa basymdyq berý ýaqyt talaby. Muny bárimiz túsinýimiz kerek. Bul máselede Qazaqstannyń bastamasy kóńilge jylylyq uıalatady. Túrli dinder men mádenıetterdiń ókilderin, saıası qaıratkerlerdi Astanaǵa jınap, jahandyq problemalardy birlese sheshýge úndeý kóregendilikti bildiredi. Prezıdent Nursultan Nazarbaev osy sezdi shaqyrý arqyly adamzat balasyna dinderdiń, mádenıetterdiń qadir-qasıetin uǵyna otyryp, onyń áleýetin beıbitshilik ornatýǵa paıdalaný qajettigin meńzep otyr, dedi «Djındjıa Honche» sıntoızm hramdary qaýymdastyǵynyń atqarýshy dırektory. Budan keıin sóz kezegi Bilim, ǵylym jáne mádenıet máseleleri jónindegi Islam uıymynyń (ISESKO) Bas dırektory Abdýlazız Osman at-Týeıdjrıge berildi. Asa qamqor, meıirimdi Allanyń atymen bastaımyn. Joǵary mártebeli Nursultan Nazarbaev myrza, sezge qatysýshy jaqsylar men jaısańdar, men úshin sizderdiń aldaryńyzda sóz sóıleý zor qurmet. Biz álemdik deńgeıdegi qaıratkerlerdiń basyn qosqan, dinaralyq kelisimdi nyǵaıta túsýdi, jahandyq máseleler týraly oı qozǵap, onyń sheshilý joldaryn qarastyrýdy maqsat etken sezge qatysyp otyrmyz. Men osy berilgen múmkindikti paıdalanyp, Qazaqstan Prezıdenti Nursultan Nazarbaevqa ystyq yqylasym men alǵysymdy bildirgim keledi, degen ISESKO Bas dırektory odan ári qazirgi tańda ǵalamdy tolǵandyryp otyrǵan ótkir, ózekti máselelerdi, onyń zardaptary jóninde áńgime órbitti. Álemniń qaýipsizdigine nuqsan keltirip otyrǵan kúshtermen kúresý, lańkestik pen atys-shabysty toqtatý bizdiń basty maqsatymyz bolýy kerek. Bul baǵytta qolǵa alynýy tıis jumystar óte kóp. Solardyń eń bastylarynyń biri retinde jahandyq únqatysýdyń qajettigin aıtar edim. Ásirese, dinaralyq kelisimniń, mádenıetter arasyndaǵy shynaıy baılanys ornatýdyń mańyzdylyǵy qaperden shyqpaýy tıis. Adamzatty izgilikke, meıirimdilikke, yntymaqqa úndeýde dinderdiń áleýetin paıdalaný qajet-aq, dedi Abdýlazız Osman at-Týeıdjrı. Budan bólek, ol Álemdik jáne dástúrli dinder lıderleriniń sezi ǵalam jurtshylyǵyna oı salatynyn, aıtýly sharany uıymdastyrý zaman talabyna sáıkes keletinin jetkizdi. Sondaı-aq, Abdýlazız Osman at-Týeıdjrı ózi basqaryp otyrǵan Islam uıymynyń beıbitshilik pen turaqtylyq ornatý baǵytynda atqaryp jatqan jumysyna, qolǵa alynǵan utymdy baǵdarlamalar turǵysynda aıta kelip, Qazaqstan men ISESKO jer betine tynyshtyq pen tatýlyq dánin sebý baǵytyndaǵy maqsat-múddeleriniń uqsas ekenin, sondyqtan, Islam uıymy Qazaqstan tarapynan kóterilgen izgilikti bastamalarǵa únemi qoldaý bildiretinin jetkizdi. Sóziniń sońynda ISESKO Bas dırektory barsha qazaqstandyqtarǵa, Prezıdent Nursultan Nazarbaevqa júrekjardy lebizin bildirdi. Dúnıejúzilik lıýteran qaýymdastyǵynyń prezıdenti Mýnıb Iýnan da óz sózin sezdi uıymdastyrýshylar men oǵan qatysýshylarǵa alǵysyn aıtýdan bastady. Sondaı-aq, ol álem jurtshylyǵy dinı lıderlerdiń ózara túsinistikpen únqatysa otyryp, jahandyq túıtkilderge, lańkestik pen ekstremızmge, alaýyzdyq otyn tutatýshylarǵa qarsy kúsh biriktirý maqsatynda jınalyp, keńese alatynyn kórýi kerek. Osy oraıda, Astana bizge múmkindik berip otyr. Dinı lıderler lańkestikke, ekstremızmge qarsy ún qatpasa, bóten pıǵyldylar degenin jasaı beredi, dedi. О́z oıyn ári qaraı jalǵaı túsken Dúnıejúzilik lıýteran qaýymdastyǵynyń prezıdenti ekstremızmdi belgili bir dinge ǵana telip kórsetý durys emestigin, árbir dinniń óz ekstremısteri bar ekenin aıtty. Men búgingi óte mańyzdy basqosýda din jantúrshigerlik oqıǵalardyń sebepkeri emes, túıtkildi ońtaılandyra sheshýshi kúsh ekenin shynaıy peıilimmen jetkizgim keledi. «Dinı ekstremızm» degeniń din emes. Bul – naǵyz dindi qorlaıtyn qubylys. Ekstremıster din atyn jamylyp, ózderiniń aram pıǵyldaryn júzege asyrǵysy keledi. Ol din lıderleri úshin ǵana emes, ozyq oıly adamzat balasyna úlken synaq. Únsiz qalsaq, ekstremısterdiń sybaılasy bolamyz, dedi spıker. Onyń sózine qaraǵanda, lańkestikke, ekstremızmge, jat ádetterge qarsy tize qosa qımyldaýda Astanadaǵy sezdiń mańyzdylyǵy óte joǵary. Sebebi, din lıderleriniń ózara suhbat qurýyna múmkindik beretin, Qazaqstanda turaqty ótkizilip kele jatqan forýmnyń bedeli zor. Budan keıin Álemdik jáne dástúrli dinder lıderleri V seziniń Deklarasııasy qabyldandy. Qujattyń mazmunyn Dinaralyq únqatysý jónindegi Papa keńesiniń prezıdenti kardınal Jan Lýı Toran oqyp shyqty. Jıyn sońynda Álemdik jáne dástúrli dinder lıderleri sezi Hatshylyǵynyń Basshysy Qasym-Jomart Toqaev qorytyndy sózdi Qazaqstan Prezıdenti Nursultan Nazarbaevqa berdi. Qazaqstan Prezıdenti sezge Iordanııa Koroli II Abdallanyń qatysyp otyrǵanyna, ol bastamashylyq etken «Amman joldaýy» men Álemdik jáne dástúrli dinder lıderleri seziniń úndestigine, bul bastamalardyń órkenıetter men konfessııalar arasyndaǵy syndarly únqatysýdy damytý úshin qajetti tuǵyrnama qyzmetin atqaratynyna nazar aýdardy. Nursultan Nazarbaev jumysy aıaqtalýǵa taıaǵan sezdiń delegattary qonaqjaı qazaq jerine taǵy da jınalý arqyly basty maqsatqa qol jetkizgenin atap ótti. – Dinder, halyqtar jáne memleketter arasyndaǵy tatýlyq pen kelisimniń asa mańyzdy ekendigin túsiný úshin bir-birimizge taǵy bir qadam jaqyndaı tústik. Dinderdiń ózara yqpaldastyǵy men olardyń jahandyq damý jolyndaǵy róli týraly ashyq suhbat jalǵasyn tapty. Álemniń turaqtylyǵy men qaýipsizdigi jolyndaǵy yntymaqtastyqqa degen ortaq múddelestik bar ekeni ańǵaryldy. О́mirdiń ózekti máseleleri jóninde sezge qatysýshylardyń barlyǵynyń ortaq nemese uqsas ustanymdary kórinis tapqan deklarasııa maquldanyp, qabyldandy. Qazaqstannyń elordasynda eki kún boıy túrli tilde, túrli dástúr boıynsha beıbitshilik, kelisim, ádilettilik, keshirimdilik jáne jaqynyńa degen súıispenshilik týraly ortaq tilek-duǵa jasaldy, – dedi Memleket basshysy. Qazaqstan Prezıdenti sezge qatysýshylardyń bárine jemisti jumystary úshin alǵys aıtty. – Qudaıǵa jasaǵan qulshylyqtary arqyly Qazaqstannyń ósip-órkendeýine nıettestik bildirip, elimizge baq-bereke tilegeni úshin túrli dinniń barsha qyzmetshilerine alǵys aıtamyn. Sezdiń barlyq zaıyrly qonaqtaryna – saıasatkerlerge, qoǵam qaıratkerlerine, sarapshylar men jýrnalısterge is-sharany tabysty ótkizýge, bizdiń ıdeıalarymyzdy ilgeriletýge qosqan baǵa jetpes úlesteri úshin shyn júrekten rızashylyq bildiremin. Dúnıede senim men aqyldy ushtastyratyn aqıqattan artyq eshteńe joq. Álemdik jáne dástúrli dinder lıderleriniń sezderi rýhanı tulǵalar men saıasatkerlerdiń únqatysýy pishiminde ótip keledi. Osylaısha biz adamdar arasyndaǵy tatýlyq pen kelisim máselelerine qatysty is-qımyldyń izgi sıpaty ar-ujdan men rýhanı qýat arqyly arta túskenin qalaımyz. Barsha qatysýshylardy sezdiń ıgi ári beıbitsúıgish ahýalyn óz pikirlesterine, seriktesterine jetkizýge shaqyramyn, – dedi Nursultan Nazarbaev. Memleket basshysy Álemdik jáne dástúrli dinder lıderleriniń V sezi jahandyq únqatysýdyń ózektiligin, onyń qajettiligi arta túskenin taǵy da aıqyn kórsetip bergenin aıtty. – Sóz ben til, ıaǵnı tildesý men únqatysý – adam balasyna, adamzatqa berilgen Qudaıdyń teńdessiz syıy. Bizdiń paryzymyz – onyń bitimgershilik jáne jasampaz qýatyn tolyǵymen paıdalaný. Búgingi V sezde jalpyǵa ortaq tatýlyq pen meıirim, ádilettilik pen rýhanı úılesim dáýirine qaraı taǵy bir qadam jasaldy. Biz jahandy kúmán-kúdik jaılaǵan kezeńde tek bir-birimizben tildesý arqyly ǵana úmitti, bolashaqqa degen senimdi oıatýǵa bolatynyn dáleldedik, – dedi Qazaqstan Prezıdenti. Budan bólek, Nursultan Nazarbaev sezdiń qyzmetine qatysty usynystaryn aıtty. – Qazirdiń ózinde sezimizdiń baı tarıhy qalyptasyp úlgerdi. Biz betpe-bet suhbat qurý jóninde eleýli tájirıbe jınaqtadyq, suhbattasý men ózara túsinisý dástúrlerin ornyqtyrdyq. Dinder men órkenıetterdiń ózge de ózara yqpaldasý uıymdarymen baılanys jolǵa qoıylyp keledi. Sondyqtan men Astanadaǵy osynaý ǵımaratta Beıbitshilik jáne kelisim mýzeıin ashýdy usynamyn. Sezimizdiń tarıhyna degen mundaı ıgi kózqaras, adamzattyń damý problemalary jónindegi birlesken sheshimder tájirıbesin jınaqtap, qorytý dinder men halyqtardyń tatýlyǵy men ózara túsinistigin nyǵaıtý úshin asa mańyzdy bolmaq. Beıbitshilik jáne kelisim mýzeıi, sondaı-aq, dinder men mádenıetter únqatysýy tarıhyn zertteıtin sezd janyndaǵy ǵylymı mekeme bolady, – dedi Memleket basshysy. Qazaqstan Prezıdenti dinder men mádenıetter únqatysýyn ilgeriletýshi tulǵalardy marapattaýdyń da mańyzdylyǵyna toqtaldy. Osy oraıda, Memleket basshysy «Rýhanı tatýlyq pen kelisimdi damytýǵa jáne nyǵaıtýǵa qosqan úlesi úshin» atty syılyq taǵaıyndaýdy usynyp, ony Din lıderleri keńesiniń sheshimi boıynsha berýge, sezdiń jalpy otyrysynda tapsyrýǵa bolatynyn aıtty. Prezıdent Nursultan Nazarbaev sezdiń eki kúndik jumysy álemge damýdyń eń qolaısyz ssenarıılerine jol bermeýge bolady degen úmit syılaǵanyna, adamzat danalyǵy men jaýapkershiligine degen senim uıalatqanyna nazar aýdardy. Álemdik jáne dástúrli dinder lıderleri sezi Hatshylyǵynyń Basshysy Qasym-Jomart Toqaev ta óz tarapynan forým jumysyna qatysýshylarǵa rızashylyǵyn jetkizdi. Budan keıin sezge qatysýshy mártebeli qonaqtardy Beıbitshilik jáne kelisim saraıynyń aldynda qurmetpen shyǵaryp salý rásimi ótti.
Jaqsybaı SAMRAT, Joldybaı BAZAR, «Egemen Qazaqstan».
